Արթուր Բաղդասարյանը կուսակիցներ է մուրում

«Հայկական վերածնունդ» կուսակցությունը քաղաքական դպրոց է բացել, անգամ դիմորդներ ունի, ռեկտոր էլ ունի՝ Գագիկ Ճաղարյանը:

Արթուր Բաղդասարյանն ի՞նչ է անելու քաղաքական դպրոցը, սովորեցնելու է մանևրել ընդդիմադիր դաշտում՝ մի ոտքով ընդդիմադիր, մյուս ոտքով՝ իշխանություն: Սովորեցնելու է, թե ինչպես խաբել մարդկանց ավանդների փոխհատուցմամբ կամ էլ սովորեցնելու է, թե ինչպես աշխատել ու ոչինչ չանել, հարստանալ՝ անբացատրելիորեն, ծառայել իշխանություններին անձնվիրաբար, չունենալ սկզբունքներ, վազել քաղաքական ասպարեզ՝ միայն թե ինչ-որ անորոշ պաշտոնի ակնկալիքով: Եթե այս ամենը որոշվել է սովորեցնել այն ուսանողներին, ովքեր դիմել են այս դպրոց՝ սովորելու ակնկալիքով, ապա շուտով երկիրս կլցվի արթուրիկբաղդասարյանիկյաններով:

Հիշեցնենք նաև, որ ժամանակ առաջ Արագածոտնի մարզի Ոսկեվազ համայքնի հատվածում՝ Շահվարդ գետում, ձկների անկում էր գրանցվել, և ենթադրվում էր՝ մեղավորը «Հայասի» կոնյակի գործարանն է, որը պատկանում է Արթուր Բաղդասարյանին, որոշ ժամանակ անց թունավորումը կրկնվեց, մարդիկ հայտնվեցին հիվանդանոցում, դարձյալ ոչինչ:

Երբ Բնապահպանության նախարարության համապատասխան բաժինն ուսումնասիրություններ էր անցկացրել, չէր կարողացել այն ժամանակվա «իշխանական» համարվող Արթուր Բաղդասարյանի գործարանում «բնապահպանական մեղքեր» գտնել, սակայն այն, որ գործարանն իր թափոնները լցնում էր գետ, գյուղացիներն էին հաստատում:

Հակաբնապահպանական, մենատնտեսական կամ էլ ուղղակի չարչարկված էժանագին օղիներից, ժամկետանց մուրաբաներից, կասկածելի պահածոներից ու տոպրակներով խոստումներից անցնելով՝ կարելի է հավելել, որ նման կերպարը չի կարող ևս իր նման կերպարներ ստեղծել հասարակության մեջ՝ իր բոլոր հետևանքներով:

Հետաքրքիր է նաև այն երիտասարդության շերտը, որ որոշել է սովորել Արթուր Բաղդասարյանի քաղաքական դպրոցում, և այս դպրոցը դեպի իրենն է ձգում պոտենցիալ արթուրիկների կամ գուցե գնում է դեպի ինքնակամ դեգրադացում:

Գուցե Արթուր Բաղդասարյանը ոգեշնչվել է մեկ օրում ի հայտ եկած 7 հազար ՀՀԿ-ականներից և որոշել է գոնե այս ճանապարհով ընտրություններից առաջ վերածննդականներ մուրալ հասարակությունից:

NEWSPRESS.am