Շարմազանովի կոչը Աշոտյանին և Ավագյանին. Ծուռվզությունը լավ բան չի, տղե′րք

Գագիկ Ծառուկյանը վերադառնում է քաղաքականություն, և ՀՀԿ-ն պետք է որոշակի վերաբերմունք որդեգրի. այդ ծանր բեռը դրված է Էդուարդ Շարմազանովի ուսերին: Խեղճ Շարմազանով, չէ՞ որ նա Ծառուկյանի «անկման» օրերին, կարծես թե շատ չխառնվեց ՀՀԿ խրախճանքին, սակայն այսօր Կարեն Ավագյանի ձայնը փորից դուրս չի գալիս, իսկ Արմեն Աշոտյանը պապանձվել է թե′ ի պաշտոնե, թե′ ուղղակի. Աշոտյանն ու Ավագյանն այլևս կրակ ու հուր չեն ժայթքում, անցավ:

Շարմազանովը մնացել է և ստիպված է պատասխանել ՀՀԿ դիրքորոշման, վերաբերմունքի հետ կապված հարցերին. Ասում են՝ Շարմազանովն այս օրերին Ազգային ժողովի մկների ծակուծուկը հազար թումանով է առնում, սակայն ստիպված է պատասխանել:

Եվ քանի որ ասելու ոչինչ չկա, ստիպված փիլիսոփայել է. «Ամեն ինչ փոփոխվում է, ամեն ինչ հոսում է»: Է՜, Շարմազանով, բա դու տե՞նց տղա էիր: Մի խելքը գլխին նախադասություն չեն կարողանում բերանից դուրս քաշել, ստիպված փիլիսոփայում է:

Նա անգամ չի անդրադարձել Ծառուկյանի վերաբերյալ ՀՀԿ դիրքորոշման փոփոխությանը, փորձել է տակից դուրս գալ. «Մենք երևույթներն ենք գնահատել, մենք անձին չենք պիտակավորել և այլն»:

Պարզ է, որ ՀՀԿ քաղաքականությունը փոխվել է, իսկ Շարմազանովը պատրաստ չէր փոփոխություններին, և հերթապահ նախադասություններն այս անգամ չեն փրկի:

Իսկ թե նախկինում ՀՀԿ-ն ի՞նչ դիրքորոշում ուներ Գագիկ Ծառուկյանի վերաբերյալ, Շարմազանովը պարզապես խորհուրդ տվեց հետ չնայել՝ ավելացնելով, որ «վիզներդ ծուռ կմնա»: Այսպես:

Շարմազանովի այս խոսքերի մեջ ենթատեքստ կա. այն զգուշացնում է Աշոտյանին և Ավագյանին՝ հետ չնայել, չհիշել այն բառապաշարը, որով գնահատում էին Ծառուկյանին, գուցե մի բան փոխվի, եթե խուլ ու կույր ես ձևանում. Այնպես որ՝ հետ մի′ նայեք, տղե′րք, ծուռվզությունը լավ բան չէ:

NEWSPRESS.am