Վարչապետի կադրային քաղաքականությունը՝ առասպել

Վարչապետի փոփոխությունը ենթադրում է արհեստավարժ կադրերի փոփոխություն տարբեր ոլորտներում, սակայն Կարեն Կարապետյանի առաջին նշանակումներից պարզ դարձավ, որ նոր վարչապետը գնում է նախկինների ճանապարհով. պաշտոնների է նշանակում իր մտերիմներին, որոնք թեև գրագետ էին, սակայն ոլորտային մասնագիտացում չունեին:

Ոչ մեկ անգամ է մամուլում հայտնվել, որ նորանշանակ ղեկավարները պաշտոնների են բերել իրենք էլ իրենց մտերիմներին՝ հեռու ոլորտային մասնագիտացումից. կադրային քաղաքականության մեջ Կարեն Կարապետյանն այդպես էլ չկարողացավ ճիշտ խոսք ասել, պարզապես դատարկեց նախկին վարչապետերի կիսատ թողած բաժակը:

Նշենք, որ նոյեմբերի 11-ին ՀՀ վարչապետը Սննդի անվտանգության պետական ծառայության պետ նշանակեց «Նատֆուդ» մսամթերքի արտադրական ձեռնարկություն ՓԲԸ-ի ղեկավար Իշխան Կարապետյանին, ով մինչև 2012 թվականը եղել է «Հայռուսգազարդ» ընկերության ղեկավարի տեղակալը:

Նշանակվելուց հետո ՍԱՊԾ-ում սկսվեցին կադրային փոփոխությունները, և այսօր ՍԱՊԾ անասնաբուժասանիտարական և բուսասանիտարական լաբարատոր ծառայությունների կենտրոն ՊՈԱԿ արդեն նախկին փոխտնօրեն Գեորգի Ավետիսյանը հանդիպել է լրագրողների հետ, որի ընթացքում շեշտել է, որ ՍԱՊԾ-ն փլուզված կառույց է, նորանշանակ պետը՝ Իշխան Կարապետյանը, որևէ առնչություն չունի ոլորտի հետ, իսկ նոր պետի նոր խորհրդականները ո′չ բժիշկներ են, ո′չ ֆիտոսանիտարներ, ո′չ էլ անասնաբույժներ, այլ մենեջերներ:

Գեորգի Ավետիսյանին պարզապես հայտնել են, որ Իշխան Կարապետյանը չի ցանկանում քեզ տեսնել այդ պաշտոնում՝ առանց հիմնավորման:

Սննդի անվտանգության խնդիրները կարող են լուծել միայն ոլորտի մասնագետները, քանի որ բանիմաց մասնագետները կարող են փոփոխություններ կատարել՝ դեպի դրականը, սակայն նման կադրային քաղաքականությամբ սննդի անվտանգության խնդիրներին լուծում չկա:

Վարչապետը ենթադրում է, որ «գազավիկներով» համալրելով գերատեսչությունները՝ Ամերիկա է հայտնաբերել, այնինչ վարչապետի նշանակած կադրերը գործում են այնպես, ինչպես բոլորը, իսկ այդպես վարչապետի կառավարությունը հեռու չի գնա, որակական փոփոխությունների մասին խոսք լինել չի կարող:

Կարեն Կարապետյանի կադրերը գազից փող քամել գիտեն, իսկ ի՞նչ գիտեն գազից փող քամողների կադրերը:

NEWSPRESS.am