Վանաձորում քաղաքական աթոռակռիվը վարակել է նաև արվեստագետներին

Վանաձորը դարձել է իսկական թատերաբեմ, որտեղ իշխանություններն անհաղորդ են խնդիրներին: Քաղաքային իշխանությունը խիստ զբաղված է աթոռը պահելու գործով, իսկ մարզային իշխանությունը ձեռքերը լվացել է քաղաքի գործերից ու ամեն ինչ թողել ինքնահոսի:

Այնպես որ՝ Վանաձորի դրամատիկական թատրոնի ճակատագիրն այստեղ կարծես ոչ ոքի չի հուզում: Մինչդեռ անհանգստանալու առիթ կա, քանի որ թատրոնի ղեկավարի աթոռի համար մրցապայքար է սկսվել արվեստագետների միջև: Տնօրենի թափուր աշխատատեղի համար հայտարարվել է մրցույթ, որը կկայանա այս տարվա դեկտեմբերի 23-ին: Չանդրադառնանք նրան, որ մրցույթի պայմանները միայն օրերս է հայտարարվել: Այստեղ հարցն այն է, թե ովքե՞ր են առաջադրվել և ի՞նչ զարտուղի ճանապարհներով են փորձում ձեռք գցել իրենց համար «համեղ պատառը»…

Նշենք, որ 2016թ. նոյեմբերի 1-ից թատրոնի տնօրենի ժամանակավոր պաշտոնակատար է նշանակվել Հանրային Հեռուստաընկերության Լոռու մարզի լրագրող, «Թատերական Լոռի» միջազգային փառատոնի տնօրեն Հրաչյա Պապինյանը: Նրանից էլ հենց NEWSPRESS.am-ը փորձեց ստանալ որոշ հարցերի պատասխաններ, սակայն Պապինյանն իր պատասխաններում լակոնիկ գտնվեց. նա ասաց, որ սկզբում որոշել է մասնակցել մրցույթին, սակայն գնալ գիտակցված պարտության, չի պատրաստվում:

Պարզվում է՝ նույն թատրոնի գեղ. ղեկավար Վահե Շահվերդյանը Պապինյանին ակնարկել է, թե իմաստ չունի մրցակցել, քանի որ ամեն ինչ արդեն որոշված է «ի վերուստ»: Բանն այն է, որ դերասանուհի Ագնեսա Շահնազարյանի համար «վերևներից» միջնորդել են:

Ի դեպ, մեր հավաստի աղբյուրների համաձայն՝ Ագնեսայի նշանակման մասին խոսակցությունները շրջանառվել են մինչ Հրաչյա Պապինյանի ժամանակավոր պաշտոնակատար նշանակվելը: Սկզբում լուրն ընկալել են որպես տնօրենի պոտենցիալ թեկնածուներին հետ պահելու պրիմիտիվ միջոց, սակայն գնալով կրքերը թեժացել են, և Ագնեսա Շահնազարյանի տնօրեն դառնալու ախորժակը մեծացել է մինչև իսկ այնքան, որ դարձյալ մեր հավաստի աղբյուրների համաձայն, այսպես ասած` «բանը հասել է դիվանբաշուն»:

Ասում են՝ գործին խառնվել է ՀՀ Նախագահի ընտանիքը, իսկ ավելի կոնկրետ` առաջին տիկինը…

Մեր տեղեկություններով՝ «վերևներից» գործին խառնված լինելու փաստն առաջադրվելու ցանկությունից հետ է պահել նաև այլ երիտասարդ կադրերի: Նրանցից մեկը մեզ հետ զրույցում նշեց, որ իրեն էլ է վաղուց հասել այն լուրը, թե տնօրենների հարցով Վահե Շահվերդյանն ու գրող Նելլի Շահնազարյանը` Ագնեսայի մայրը, մեղմ ասած, դռնեդուռ են ընկել` նախարարությունից հասնելով մինչև նախագահական:

Հրաչյա Պապինյանը ևս լսել է «վերևների» մասին, սակայն մեզ հետ զրույցում նա դժվարացավ ասել, թե արդյո՞ք խոսքը հենց առաջին տիկնոջ մասին է:

Ամեն դեպքում ի սկզբանե իր թեկնածության մասին հայտարարած Հ.Պապինյանն այսօր ավելի պասիվ է դրսևորվում, իսկ ավելի կոնկրետ՝ ոչ մի կերպ չի դրսևորվում:

Մինչդեռ թատրոնի մեր աղբյուրները տեղեկացրին, որ մինչ այս խոսակցությունները, նա ծրագրեր էր մշակել փոփոխությունների և զարգացման վերաբերյալ, նախանշել շենքում նորոգումների, ստեղծագործական ու վարչական փոփոխությունների, երիտասարդության առաջխաղացման ուղղություններով, կազմել և ցույց է տվել Վանաձորի թատրոնի զարգացման հայեցակարգը:

Աշխատակազմից մեզ ասացին նաև, որ Պապինյանի փոփոխությունն զգացել են նախարար Արմեն Ամիրյանին հանդիպելուց հետո. «Էնպես կտրուկ փոխվեց, կարելի է ասել՝ 180 աստիճանի շրջվեց… աշխատողներից մի քանիսին էլ ասել է, որ չի պատրաստվում մասնակցել մրցույթին…»,- ասաց մեր զրուցակիցը՝ չբացելով փակագծերը:

Պապինյանը ևս չի ժխտում, որ հանդիպել է նախարարի հետ, բայց ասում է, թե իբր նախարարի հետ քննարկել են թատրոնի հետ կապված հարցեր: Սա այն դեպքում, երբ մի քանի օրից ավարտվում է նրա պաշտոնավարման ժամկետը…

Պարզ է դառնում` «սև գործն» արդեն արված է. մեր հավաստի աղբյուրներից իմացանք նաև, որ Հրաչյան նեղ շրջապատում ասել է, թե նախարարությունից իրեն խնդրել են չմասնակցել մրցույթին:

NEWSPRESS.am-ը կապ հաստատեց նաև Վահե Շահվերդյանի հետ: Դիտարկմանը, թե խոսակցություններ կան, որ նա շահագրգռված է տնօրենի պաշտոնում իր թեկնածուի առաջադրման հարցում` մասնավորապես Ագնեսա Շահնազարյանի հետ կապված, նա կտրուկ պատասխանեց:

«Ես անստորագիր խոսակցություններին ուշադրություն չեմ դարձնում… որքանով տեղյակ եմ, մի քանի հոգի են մասնակցում մրցույթին. ով կանցնի մրցույթը` թող նա էլ բարով գա.. ավելին ոչինչ չեմ ասում… ցտեսություն»,- ասաց Շահվերդյանն ու անջատեց հեռախոսը:

Թե որքանով են համապատասխանում լուրերն իրականությանը, փորձեցինք պարզել Ագնեսա Շահնազարյանից` հուսալով, որ նա մի քիչ անկեղծ կգտնվի, սակայն նրա հետ մեզ կապ հաստատել այդպես էլ չհաջողվեց: Նրան մոտ գտնվողներից մի քանիսը նույնիսկ ասացին, որ Ագնեսան խիստ հրահանգել է իր համարները ոչ ոքի չտալ ու հատկապես այս օրերին, նա չի ցանկանում խոսել լրագրողների հետ, քանի որ իբր պատրաստվում է տնօրենի թեկնածուների մրցույթին:

Դարձյալ չանդրադառնանք նրան, թե ինչպես է «պատրաստվում» մրցույթին Ագնեսան, պարզապես անուններ չտալով, այնուամենայնիվ ուզում ենք նկատել, որ Ագնեսային Վանաձորում չեն սպասում ու չեն տեսնում նրան որպես ղեկավարի:

«Հրաչը կարգին տղա է, արդեն գործերին ծանոթ ենք, աշխատում է, իսկ Ագնեսան ի՞նչ…»,- ձեռքը թափ տալով ասաց թատրոնի աշխատակիցներից մեկը, ով չցանկացավ ներկայանալ:

Հավելենք միայն, որ 36-ամյա Ագնեսան, սերիալներում նկարահանվելուց ու թատրոնում խաղալուց հոգնելով ու թատրոնի հետ իր ապագան չկապելով՝ փորձել է եկամուտ ստանալ Մոսկվայում: Փախչելով հայրենիքից՝ նա այնտեղ իր ընկերուհու հետ բիզնես է դրել. գումարներ է աշխատել ֆուրշետներով ու վարսավիրանոց բացելով, սակայն գործը տապալվել է, և նա ստիպված վերադարձել է Հայաստան` ետևում թողնելով ֆուրշետն ու հմայքը….