ՏՄՊՊՀ կատակերգությունը՝ դեռևս մեկ գործողությամբ

Պարարտանյութերի գնման ծրագրով պետությունը կարող էր խնայել ավելի քան 1,5 մլրդ դրամ: Այս մասին հայտարարվել է ՀՀ տնտեսական մրցակցության պաշտպանության պետական հանձնաժողովի նիստում, որտեղ հրապարակել է գյուղացիական տնտեսություններին պարարտանյութերի մատակարարման ոլորտում իրականացրած ուսումնասիրության արդյունքները:

Եվ նման եզրահանգման են եկել, երբ արդեն 4 տարի է` ծրագիրն իրականացվում էր, և Գյուղնախարարության կողմից հայտարարվում էր` որպես գերատեսչության լավագույն ծրագրերից, եթե ոչ լավագույնը։

Տարիներ շարունակ պետությանը պատճառվել է 1,5 մլրդ դրամի վնաս, և այդ ծրագիրը կոչվել է լավագույնը: 

ՏՄՊՊՀ-ն այս տարիներին չի անհանգստացել, որ պարարտանյութերը տրամադրում է «Մասիսի բերրիություն» ընկերությունը, իսկ դիզվառելիք՝ «Ֆլեշ» ընկերությունը՝ առանց մրցույթների։

Նշենք, որ այս հարցերը ժամանակին միշտ էլ բարձրացվել են, սակայն ուշադրություն դարձնող չկար։ 

Բացի այդ, «Մասիսի բերրիությունը» թանկ գնով և ամբողջական իրացնելով պարարտանյութը, որի որակից, ի դեպ, գյուղացիները դժգոհ էին, կարողանում էր միանգամից իր գումարը ստանալ, քանի որ պարարտանյութերի և դիզվառելիքի համար նախօրոք էին վճարում, հակառակ դեպքում՝ գյուղացիները չէին ստանա։

Բացի այդ, «Մասիսի բերրիություն» ընկերությունը կարող էր ավելի ցածր գնով ձեռք բերել, գուցե ձեռք էր բերում և ավելի ցածր գնով իրացնել՝ այդպիսով շուկայում նվազեցնելով ազոտական պարարտանյութի արժեքը, որը հասնում է մինչև 10 000 դրամի, սակայն ոչ մեծաքանակ պարարտանյութ իրացնելով՝ «Մասիսի բերրիություն» ընկերությունն ունեցել է գերիշխող դիրք՝ գյուղացիներին մատակարարելով պահանջված պարարտանյութի 74 տոկոսը։

Հիշեցնենք, որ 2015թ. «Մասիսի բերրիությունը» մատակարարել է ընդհանուր առմամբ 32 հազար 720 տոննա պարարտանյութ, ինչի դիմաց ընկերությանը տրամադրվել է 2 մլրդ 48 մլն դրամ պետական սուբսիդիա, ևս 204 մլն դրամ դրամաշնորհ՝ մարզերի մատակարարումների համար, ինչպես նաև 3 մլրդ 992 մլն դրամ բյուջետային վարկ՝ 0,001 տոկոս տոկոսադրույքով:

Արդյունքում, ազոտական պարարտանյութի 1 տոննան գյուղացիական տնտեսություններին իրացվել է 120 000 դրամով: «Մասիսի բերրիությունն» ազոտական պարարտանյութի 1 տոննան Վրաստանից ձեռք է բերել շուրջ 323 ԱՄՆ դոլարով:

Մինչդեռ մեկ այլ ընկերություն՝ «Գրինպրոդուկտ» ՍՊԸ-ն, որը ներգրավված չէ պարարտանյութի մատակարարման ծրագրում, նույն տեսակի 1 տոննա պարարտանյութը նույն երկրից ձեռք է բերել 239 ԱՄՆ դոլարով՝ այսինքն 26%-ով ավելի էժան:

Լավ, ինչո՞ւ է այս ամենի մասին ՏՄՊՊՀ-ն հիմա խոսում, երբ արդեն չկան Գյուղնախարար Սերգո Կարապետյանը և Ֆինանսների նախարար Գագիկ Խաչատրյանը, ում էլ, ըստ մեր տեղեկությունների, պատկանում է «Մասիսի բերրիություն» ընկերությունը։

Գագիկ Խաչատրյանը ՊԵԿ նախագահն էր, հետո էլ Ֆինանսների նախարարը, և ահա թե ինչու էին գյուղացիների համար էժան պարարտանյութ ձեռք բերում, ոչ թե ուշագնաց էին լինում գյուղացիների համար, պարզապես գրպաններն էին լցնում, անունն էլ դնում էին բարի գործ։ Նշենք, որ այս պարագայում Սերգո Կարապետյանը պարզապես գործիք էր և՝ հասկանալով հանդերձ իրավիճակը, ստիպված էր գովերգել Գագիկ Խաչատրյանի հաստացման ծրագիրը։

Լավ, ինչո՞ւ չի խոսվում «Ֆլեշի» մասին, չէ՞ որ այս ընկերությունը «մատչելի» դիզվառելիք է մատակարարում՝ նույն ծրագրի շրջանակներում։ Իրականությունն այն է, որ «Ֆլեշի» սեփականատեր Բարսեղ Բելգարյանը դեռ ձիու վրա է, այդ է պատճառը, որ ՏՄՊՊՀ-ն դեռ դիզվառելիքի մատակարարումներին չի դիպչում: Երբ Բարսեղ Բեգլարյանը թամբից կընկնի, այն ժամանակ էլ ՏՄՊՊՀ-ն համապատասխան «բացահայտումներ» կանի դիզվառելիքի մատակարարման շուկայում։

NEWSPRESS.am