ՀՀԿ-ն վարչապետին կրակն է գցել

ՀՀ վարչապետ Կարեն Կարապետյանը հայտարարել է, որ գերատեսչությունների ղեկավարները դեկտեմբերին պետք է աշխատեն արտակարգ ռեժիմով։ Ենթադրվում է, որ ՀՀԿ համագումարից առաջ նախարարներն զբաղված էին ՀՀԿ-ական դառնալու մոլուցքով, այդ մոլուցքին միացրել էին «Գազպրոմ-Արմենիայի» աշխատակիցներին, ինչը ժամանակ և ռեսուրսներ է խլում։

Կարճ ասած՝ վարչապետը հասկացել է, որ կուսակցական ճանապարհ ընտրած նախարարներն իրենց գերատեսչություններին պատշաճ ուշադրություն չեն դարձնում, որպեսզի ի լուր աշխարհի չհայտնի այդ մասին, դիմել է դիվանագիտական միջոցներին։

Նշենք, որ այս կարճ ընթացքում, բացի «գազավիկի» կարգավիճակից, չունենալով այլ գերատեսչական փորձ, նախարարները պետք է հարմարվեին դեռևս նախարարական աթոռներին՝ հարմարավետ զգալուց հետո, աշխատանքային ողջ ծանրությանը դիմանալու համար։ Նախարարները, կառավարության նորանշանակ աշխատակիցները, չդիմանալով նման աշխատանքային ռեժիմին՝ դիմել էին կուսակցական թմբիրին․ արդարացնել իրենց անհամապատասխանությունը կուսակցականությամբ։

Եթե անձը պատասխանատու է և կարող է այս կամ այն ոլորտը կարգավորել, ի վերջո՝ աշխատել, ապա կուսակցությունը նրան չի օգնի։ Բայց խեղդվողները բռնել են փրփուրներից, գնացել են նախկինների ճանապարհով։ Այսինքն՝ նախարարներ փոխելով՝ ոչինչ չի էլ փոխվել․ նույն կուսակցամտությունը, նույն անհետևողականությունը։

Եթե այժմ նախարարները կուսակցական թմբիրի մեջ են, վարչապետի հրահանգը կարո՞ղ է փոխել նրանց աշխատելաոճը դեկտեմբերին։

Կարճ ասած՝ ՀՀԿ-ն վարչապետին կրակն է գցել․ կա′մ իր կադրերը պետք է ՀՀԿ-ացման ճանապարհը բռենեին՝ աշխատելով այդ ուղղությամբ, կա′մ պետք է գերատեսչական աշխատանքներով զբաղվեին։ Մինչև այժմ նախարարները և նորանշանակ կառավարության ներկայացուցիչներն զբաղված են կուսակցամոլությամբ, իսկ վարչապետի խոստացած փոփոխությունները հիշեցնում են նախընտրական խոստումներ։

NEWSPRESS.am