Կուսակցական դառնալու հերթը հասավ բժիշկների՞ն. երիտասարդ բժիշկները Գյումրիում արտագնա նիստ են անցկացրել

Երեկ «Գյումրի» բժշկական կենտրոն էին այցելել երիտասարդ բժիշկները, ովքեր նոյեմբերի 19-ին Ծաղկաձորում հիմնադիր համագումար էին անցկացրել ու մոտ 1200 երիտասարդ բժիշկներով որոշել ստեղծել «Երիտասարդ բժիշկների ազգային խորհուրդ», գործադիր մարմին, հաստատել իրենց նպատակներն ու ծրագրերը։

Բժիշկների նոր սերունդը որոշել է զբաղվել բժիշկների շահերի պաշտպանությամբ:

Երիտասարդ բժիշկների ազգային խորհրդի նախագահ Նարեկ Վանեսյանը NEWSPRESS.am-ի հետ զրույցում նշեց. «Բժիշկների անպաշտպանվածությունն է մեզ միավորել, մենք պիտի սատարենք բժշկին իրավական առումով: Էսօր ոստիկանը, փրկարարը, մեկ այլ ծառայող ունեն իրենց վերաբերող օրենսդրություն, բժիշկը չունի իր մասին օրենք, բացի բժշկական օգնության, սպասարկման մասին օրենքից։ Մենք գտնում ենք, որ բուժաշխատողի մասին օրենսդրության ստեղծման մասին պիտի մտածենք, որով նաև ապահովված լինի բժշկի իրավական, սոցիալական և այլ պաշտպանվածությունը։ Մենք գիտենք բազում դեպքեր, երբ ծեծել են բժշկին, վատ վերաբերվել»։

Բայց միայն բժշկի պաշտպանվածությունը չէ որ կարևորում են երիտասարդ բժիշկները. նրանց կարծիքով՝ անհրաժեշտ է ուշադրություն դարձնել բժշկական որակին։ Հիվանդը ևս պետք է պաշտպանված լինի։

«Մենք ընդունում ենք, որ լինում են բժշկական սխալներ, բայց չկան ստանդարտներ, որով հիվանդը կկարողանա ապացուցել, որ սխալ է թույլ տրվել։ Կարծում եմ, որ պետք է ստեղծվի անկախ բժշկական հանձնաժողով, որը կսահմանի բուժման ստանդարտներ, ու ցանկացած սխալի համար բժիշկը պատասխանատվություն կկրի։ Որակ ապահովելու համար, սակայն, կարևոր են վերապատրաստումները։ Այսօր մարզերում երիտասարդ բժիշկներն ավելի քիչ են ստանում, քան Երևանում։ Դա կապված է և՛ հիվանդների հոսքի, և՛ հիվանդանոցների կողմից մատուցվող որակյալ ծառայությունների, և՛ շենքային պայմանների հետ։ Ու բժիշկը չի կարող հոգալ վերապատրաստման ծախսերը։ Մենք գտնում ենք, որ պետությունը պետք է երիտասարդ բժիշկների մասնագիտական վերապատրաստման գործընթացի պատասխանատվությունը վերցնի իր վրա»,- ասաց Նարեկ Վանեսյանը։

«Երիտասարդ բժիշկների ազգային խորհուրդին» կարող են աջակցել բոլոր կազմակերպությունները: Առայժմ միայն աջակցում է «Ռեսո» ընկերությունը, բայց աջակցողը չպետք է թելադրի։ Իսկ այն հարցին՝ հնարավո՞ր է, որ 1200 երիտասարդ անդամներով անդամակցեն որևէ կուսակցության, որ իրենց ծրագրերն իրագործվեն, խորհրդի նախագահը պատասխանեց. «Անգամ հասարակական գործունեությունը մեծ ծանրաբեռնվածություն է բժշկի համար, մենք Հիպոկրատի երդում ենք տալիս, որ կրոնական, ռասսայական, տարբերությունների դեպքում, անգամ եթե թշնամի են, պետք է բուժենք, բայց հիմա իրավիճակն այնպիսին է, որ որոշներն իրենց հաջողությունները տեսնում են քաղաքակական խողովակներով: Դա անձնական որոշում է, մենք ոչինչ չենք կարող ասել կամ խորհուրդ տալ։ Բայց, կարծում եմ, որ երիտասարդի համար կարևորը մասնագիտական գիտելիքներ ստանալն է»։

Խոսքը եզրափակելով նա նաև նշեց, որ քաղաքականությունն ու բժիշկները որոշակիորեն անհամադրելի են. «Բուժող բժիշկների մասին է խոսքը»։

Նշենք, որ Երիտասարդ բժիշկների նորաստեղծ ազգային խորհուրդը պատվավոր անդամի կոչում է շնորհել «Գյումրի» բժշկական կենտրոնի տնօրեն Արմեն Իսահակյանին, քանի որ նա առաջին օրվանից եղել է այդ գաղափարի կողքին, ավելին՝ կարողացել է Գյումրի բժշկական կենտրոնը համալրել երիտասարդ կադրերով։ Այստեղ տարբեր բաժանմունքներում աշխատում է 40 երիտասարդ։