Գագիկ Բեգլարյանը նեղացած չէ

Այսօր տեղի է ունենում ՀՀԿ 16-րդ համագումարը, որին մասնակցում էր նաև Տրանսպորտի և կապի նախկին նախարար Գագիկ Բեգլարյանը։

Լրագրողների հետ ճեպազրույցի ժամանակ նախ և առաջ Գագիկ Բեգլարյանը ճշտում արեց իր՝ Տրանսպորտի և կապի նախարարի պաշտոնը թողնելու վերաբերյալ: Նա նշեց, որ եթե աշխատանքից դուրս են գալիս, դա չի նշանակում՝ նրանցից ազատվում են և հորդորեց «վատ չձևակերպել» հարցը, և «նրանց փոխարինում են մարդիկ, որոնց աշխատանքներին կհետևենք»։

«Նեղանալը տղամարդու համար չէ»,- շեշտեց Բեգլարյանը և լրագրողներին հորդորեց, որ եթե տղամարդը ձեզանից նեղանա՝ նրան ընդհանրապես չընդունել։

Ինչ վերաբերում է ներկային, ապա Գագիկ Բեգլարյանը հաղորդեց, որ առայժմ տանը հանգստանում է թոռնիկի հետ։

Հարց հնչեց նաև Հյուսիս-հարավ ավտոճանապարհի չարաշահումների վերաբերյալ, որին Տրանսպորտի և կապի նախկին նախարարը պատասխանեց, որ ո′չ նախարարության, ո′չ կառավարության կողմից չարաշահումներ չեն եղել, իսկ ինչ վերաբերում է «Կորսան Կորդիա» ընկերությանը, ապա հետգանձում է կատարվել շուրջ 7 մլն դոլարի, որը վերահսկողության արդյունք է։

Լրագրողները հետաքրքրվեցին, թե արդյոք հավակնո՞ւմ է Երևանի քաղաքապետի պաշտոնին, ինչին ի պատասխան՝ Գագիկ Բեգլարյանն ասաց․ «Մեզ մոտ ամեն ինչ որոշում է կուսակցությունը»:

Նա պատասխանեց նաև Կարեն Կարապետյանի կողմից հնչեցված «պրիմիտիվ գողություններին» վերջ դնելու հայտարարությանը, շեշտեց, որ վարչապետն իրեն նկատի չի ունեցել:

Գագիկ Բեգլարյանն ընդգծեց նաև, որ խորհրդարանական ընտրություններում կաջակցի իր թիմին, քանի որ բոլորը քաղաքականության մեջ են՝ պաշտոնով, թե առանց պաշտոնի։