Միքայել եպիսկոպոս Աջապահյանը Պոլսո Պատրիարքի ընտրություններում իր նախընտրելի թեկնածուն ունի

Թուրքիայի հայերի համար պատմականորեն այնպես է ձևավորվել, որ համայնքը չունի այլ կազմակերպական, կառավարման մարմին, որը կարող է հայության շահերը ներկայացնել պետական տարբեր ատյաններում։ Այս առաքելությունը դրված է Կոստանդնուպոլսի Հայոց պատրիարքության և պատրիարքի վրա։

Հիշեցնենք, որ Մեսրոպ արքեպիսկոպոս Մութաֆյանը 8 տարի հիվանդության պատճառով անգործունակ է։ Հովվապետական գործերն հանձնել էր փոխանորդ Արամ արքեպիսկոպոս Աթեշյանին։ Հոկտեմբերի 26-ին գումարված եկեղեցական համաժողովի ժամանակ, սակայն, «Պատրիարքական ուխտի» լուծարվեց։

Շիրակի թեմի առաջնորդ Միքայել եպիսկոպոս Աջապահյանից NEWSPRESS.am-ի թղթակիցը փորձեց պարզել որոշ մանրամասներ Պոլսո պատրիարքի ընտրությունների կարգի մասին ու թե ինչո՞ւ մինչ այժմ չէր արտոնվում ու նշանակվում նոր ընտրություն։

Միքայել սրբազանի կարծիքով՝ նոր պատրիարքի ընտրություն անցկացնել այս անգամ կարտոնվի․ «Կրոնական ժողովը, ի վերջո, իմաստություն է ունեցել գահը թափուր հռչակելու և պատրիարքին հանգստյան կոչել։ Եթե գահը թափուր է հռչակվում՝ թուրքական իշխանությունը պետք է արտոնի, որ նոր ընտրություն անցկացվի։ Արտոնություն տվողը կենտրոնական իշխանությունն էլ չէ, Ստամբուլի կուսակալությունն է։ Կարծում եմ, որ այս անգամ կարտոնի, որովհետև գահը թափուր է հռչակվել»։

Նոր ընտրություններով ընտրվելու է «Ազգընտիր պատրիարք», ով կլինի Պոլսո Հայոց 85-րդ պատրիարքը։ Ընտրական կարգի համաձայն՝ պատրիարքը պետք է ծնված լինի Պոլիսում. «Թեկնածուները գոնե իրենց մանկությունն ու պատանեկությունը Թուրքիայում անցկացրած մարդիկ են և Թուրքիան ներսից գիտեն, մնացածը կարողությունների հարց է։ Դրա համար գոյություն ունի ընտրող մարմինը, կրոնական ու ազգային խառը ժողովը, որն իր ցանկությամբ կընտրի իր համար նախընտրելի մեկին։ Իրենք պիտի ընտրեն, իրենք էլ վայելեն»,- հավելեց թեմի առաջնորդը, իսկ ընտրողները հայ առաքելական եկեղեցու հոգևորականներն ու զավակներն են։

Բայց կան կուտակված բազմաբնույթ խնդիրներ, որոնք պետք է փորձի լուծել նորընտիր պատրիարքը։ «Ստամբուլահայ կրոնական, եկեղեցական և ազգային կյանքը աշխուժացնելու անհրաժեշտություն կա, այսօր ստամբուլահայ համայնքը մի իրավիճակի առջև է, որ հայախոսությունը պակասում է, խառն ամուսնություններն արդեն զգալի թիվ են կազմում, սա լուրջ մարտահրավեր է: Գոյություն ունի եկեղեցիների և ազգապատկան կալվածքների պաշտպանության և պահպանության հարց, իսկ Ստամբուլից դուրս գոյություն ունի եղած պատմամշակութային ժառանգությունն ինչ-որ կերպով փրկելու և կորսված հայերին գտնելու ու փրկելու հարց, թուրք իշխանությունների հետ լեզու գտնելու հարց։ Մի խոսքով՝ հարցերը շատ-շատ են»։

Պոլսո պատրիարքի ընտրություններում շրջանառվում է երեք թեկնածուի անուն` Պոլսո պատրիարքի փոխանորդ Արամ արքեպիսկոպոս Աթեշյան, Գերմանիայի թեմի առաջնորդ Գարեգին արքեպիսկոպոս Բեքչյան, Գուգարաց թեմի առաջնորդ Սեպուհ արքեպիսկոպոս Չուլջյան:

Շիրակի թեմի առաջնորդը բոլոր թեկնածուներին ծանոթ է, բայց իր նախապատվությունն ունի․ «Սեպուհ սրբազանն իմ մանկության, պատանեկության և հասունության բարեկամն է, ընկերն է, բնականաբար, եղած թեկնածուների մեջ, որոնց անունները հնչում են, որևէ մեկին դեմ չեմ, բայց իմ համակրանքը Սեպուհ սրբազանի կողմն է»։