Իգնատի Առաքելյանի իրական «ես»-ը որոնվում է ոստիկանության կողմից

Երեկ ՀՀ գյուղատնտեսության նախարար Իգնատի Առաքելյանը հայտարարել է, որ անդամակցելու է ՀՀԿ-ին։ Հայաստանում վերջին օրերին «համաճարակ» է՝ ոչ թե գրիպի, այլ ՀՀԿ-ականացման․ այստեղ Առողջապահության նախարարությունն անզոր է։

Պարզվում է՝ «համաճարակը» նախ «հարվածում է» գլխին, որից թուլացնում է շարժունակությունը և մարդը քայլում է իրեն մինչ այդ անհայտ ճանապարհով կամ վերադառնում է մանկություն և ցանկանում վերակենդանացնել մանկության երազանքները։

Ասում են՝ ՀՀ գյուղատնտեսության նախարար Իգնատի Առաքելյանը դարձել է «համաճարակի» առաջին «զոհերից»։ Թեև ասում են՝ այս հիվանդության տեսակը որքան հին, այնքան էլ նոր է և ենթարկվել է մուտացիայի, նաև տմարդի է՝ կարող է կա′մ գլխին հարվածել, կա′մ էլ պարզապես հարվածել։

Իհարկե, ցավալի է, որ երիտասարդ նախարարին վիճակված է անցնել ապաքինման բարդ ու դժվարին ճանապարհ, իսկ մինչ ապաքինումը նա կարող է հույսը ՀՀԿ-ի վրա դնել․ «պետպատվեր» են խոստացել։

Լսելով «պետպատվերի» մասին՝ Իգնատի Առաքելյանն առանց վարանելու ՀՀԿ-ին անդամակցելու դիմում է ներկայացրել և նա նախահհկանացման շոկային վիճակում ասել է, որ իրեն հաճելի է ՀՀԿ գաղափարախոսությունը: Միայն թե հիվանդությունն այնպես էր հարվածել երիտասարդ նախարարին, որ չի կարողացել մտաբերել, թե հատկապես ՀՀԿ-ի ինչն է հաճելի: 

Վիճակն այնքան ծանր է եղել, որ անգամ Նժդեհին չի կարողացել հիշել։

Նախարարը նաև փորձել է հարցնել, թե ՀՀԿ-ն ի՞նչ կապ ունի Նժդեհի հետ, որից հետո շրջապատը ծանր հոգոց է հանել՝ բուժման հույս կա՞:

Մասնագետները խոստանում են, որ նա ողջ և առողջ ՀՀԿ-ից դուրս կգա, հենց «համաճարակն» անցնի։

Այնպես որ՝ պետք է սպասել մինչև «համաճարակն» անցնի, միայն թե այժմ ՀՀԿ-ում, գյուղնախարարությունում Իգնատի Առաքելյանին են ման գալիս, որ բալասանեն: Ասում են՝ դիմում է գրել, դուրս է նետվել կառավարության շենքից՝ ճեղքելով լրագրողների պատնեշը և անհետացել մոտակա նրբանցքներում․ ոստիկանությունը և ՀՀԿ-ն պարգև են խոստացել՝ Իգնատի Առաքելյանի իրական «ես»-ը գտնողներին։

Սպասենք և հուսանք։

NEWSPRESS.am