Երբ արդեն գրքի տեսքով եմ կարդում, ինձ թվում է՝ ես չեմ գրել. կայացավ Արթուր Հայրապետյանի «Սարդոստայն» գրքի շնորհանդեսը

Անբացատրելի զգացում ունեմ. ես մնում եմ միշտ Աստծուն սպասող… Այսպես սկսեց արձակագիրն իր խոսքը: Օրեր առաջ the club ԱԿՈՒՄԲ-ում տեղի ունեցավ գրականության մեջ ևս մի շնորհալի մարդու, մնայուն արձակագրի, լրագրողի, հրապարակախոսի, սցենարիստի՝ Արթուր Հայրապետյանի թվով երրորդ՝ «Սարդոստայն» գրքի շնորհանդեսը: Գեղեցիկ միջավայր՝ գեղեցիկի աշխարհում:

Ներկաները գոհունակությամբ, սիրով արտահայտվեցին Արթուր Հայրապետյան մարդու, գրողի մասին: Գինով օծվեց «Սարդոստայն» գրքի խմբագիր Սեդա Կարապետյանի և հեղինակի կողմից: Ու ինչպես վաստակավոր արտիստ Լալա Մնացականյանը իր խոսքում ասաց. «Դու` Արթուր, այն մարդկանցից ես, որի վրա մարդիկ հույս են դնում: Ու մշակույթը մշակույթ չի դառնա, եթե այն վաճառես: Դու այն տեսակն ես, որ չծախվող է, մտավորականին հարիր: Ես հպարտ եմ քեզնով, որ դու իմ ուսանողն ես»:

Այսօր գիրքն արդեն վաճառվում է Մաշտոցի «Բուկինիստ» գրախանութում:

Արթուրը մեզ հետ զրույցում նշեց, թե չի սիրում իր գրականության մասին ինքը խոսել «Թող իմ գրականության մասին ընթեցողը կարծիք հայտնի, ինչպես որ միշտ հայտնել է: Երկար ժամանակ չի պահանջել գրքի լույսընծայումը: Հիմա, երբ արդեն գրքի տեսքով եմ կարդում, ինձ թվում է՝ ես չեմ գրել: Դա նրանից է, որ խմբագիրս այնքան լավ է աշխատել, ինձ իմ աշխարհին ծանոթ լինելով, որ գիրքը միայն դրանից շահել է… Ուստի մնում է գնել գիրքն ու ընթերցել»:

Շնորհավորում ենք հեղինակին, ցանկանում ստեղծագործական վերելքներ: