Այն ո՞վ ասաց՝ «մյաու», կամ ինչպես գեներալը գերի վերցրեց Հովիկ Աբրահամյանին

Պատմում են, որ մի անգամ գեներալ Մանվելը կանգնել է Հովիկ Աբրահամյանի հետևում և մլավել. «մյաու»:

Սովորական պայմաններում դա սովորական երևույթ է Մանվել Գրիգորյանի համար, սակայն Հովիկ Աբրահամյանի կողքին «մյաուն» այլ իմաստ ունի:

Ասում են, որ Հովիկ Աբրահամյանը գեներալ Մանվելից ազատվելու համար, որ ամեն անգամ տեսնելուց կամ ամեն անկյունում չմլավի, դրանից հետո գեներալ Մանվելն ինչ ասել է, այն ժամանակվա ԱԺ նախագահ Հովիկ Աբրահամյանին, կատարել է: Նախ գեներալին տվել է սրտի ուզած համարանիշները, ապա թույլատրել է մտնել Ազգային ժողովի բակ՝ իր մեքենայով, ինչը չի թույլատրվում: Չի բացառվում, որ այս շարքը շարունակելի է, դեռևս հանրությանը անհայտ:

Կարճ ասած՝ այս, այսպես ասած, ապօրինություններին Հովիկ Աբրահամյանը գնացել էր «հանուն փրկության», իսկ ինչպես գիտենք, «հանուն փրկության» ուղղված բոլոր քայլերն ընդունելի են:

Եթե նման արարքն աստվածահաճո է Հովիկ Աբրահամյանի կատարմամբ, ապա անհասկանալի է, թե գեներալ մարդ, ինչո՞ւ է անհարմար վիճակում դրել պարոն Աբրահամյանին, հո գերի՞ չի:

Պարզվում է՝ գերի է, քանի որ Հովիկ Աբրահամյանը գնացել է, իսկ գեներալի արտոնությունները մնացել են:

Եվ հետո ասում են՝ խոսքն ուժ չունի. գեներալ Մանվելը խոսեց կարճ և հատու, ներողություն, չխոսեց, այլ մլավեց, և Ազգային ժողովի արտոնությունները գրպանում են: Այլապես պետք է Հովիկ Աբրահամյանին երկար-բարակ բացատրեր, թե ինքը, լինելով գեներալ մարդ, ինչ է ուզում: Իսկ այսպես Աբրահամյանը հասկացավ, որ գեներալի ցանկությունների դիապազոնն արտոնյալ համարանիշներն են, արտոնյալ երթևեկն Ազգային ժողովում:

Դե լավ է, որ գեներալը ուշ-ուշ է գալիս ԱԺ, թե չէ Ազգային ժողովը գեներալական կայանատեղի էր դառնալու:

NEWSPRESS.am