Լֆիկը հռհռում է

Կգա նոր վարչապետ, կփոխի երկիրը, և մարդիկ լուռ ու մունջ կգնան նրա հետևից: Եվ կասի նա զորեղ խոսքեր, մարդիկ ապշահար կլինեն նորամուծություններից և կգնան նրա հետևից, սակայն կլինեն խուլեր և անկյալներ, ովքեր չեն լսի վարչապետի խոսքը, անհաղորդ կմնան վարչապետական հորդորներին և վերերկրային սիրուն, կգնան խոտոր ճանապարհով: Այնժամ նրանց գլխին կթափվի երկնային եռացող կուպրե կաթսան. հետևանքների համար վարչապետը պատասխանատվություն չի կրում:

Կարճ ասած՝ եռացող կուպրը լցվելու է Սամվել Ալեքսանյանի գլխին, ով ականջալուր չի եղել վարչապետի հակամենաշնորհային հրապարակումներին և գնացել է էլ ավելի խոտոր ճանապարհով, քան մինչև այժմ:

Նախ բավական չէ, որ օդից կախված լուրերի համաձայն՝ հարգանքի արժանի Սամվել Ալեքսանյանը շաքարավազին սոդա է խառնում, որ բացի իրենից ոչ ոք չկարողանա շաքարից օղի թորել, այժմ էլ լինելով միակ ու անկրկնելի շաքար ներկրող՝ Հայաստանի «շաքարի ներկրման արքան» շաքարը թանկացրել է:

Ասում են, որ վարչապետն անհավասար մարտում կռվել և բարոյական հաղթանակ է տարել Միհրան Պողոսյանի նկատմամբ, կարողացել է բանանի այլընտրանքային ներկրող գտնել, սակայն, ինչպես երևում է, Լֆիկի «հախից դեռ չի կարողանում գալ» և մինչև այդ պատմական պահը, վարչապետն ապավինելու է երկնային կուպրե միջամտությանը:

Քանի որ ապրում ենք քիչ թե շատ քաղաքակիրթ պայմաններում և թրով-սրով-հրով հնարավոր չէ Լֆիկի հարցերը լուծել, ապա, ասում են՝ վարչապետը գիշերները կառավարությունում մտմտում է, թե ինչպես քաղաքավարի մենամարտի Լֆիկի հետ, ոչ միայն մենամարտի, այլև՝ հաղթի:

Լֆիկն առաջին մենամարտը շահել է, հերթական անգամ թանկացրել է շաքարավազը 350 դրամից հասցնելով 405 դրամի: Եվ քանի որ շաքարավազի ներկրման մենաշնորհը Լֆիկի միակ արժանիքն է, ապա քնել է, կողքից տիկին Շողերը բոթել է՝ «Լֆո, արի պեսոկը թանկացնենք, որ էդ Կարենն իմանա, թե ով ա էս երկրի իրական պեսոկ ներկրողը»: Ինքն էլ որպես հավատարիմ և սիրելի ամուսին՝ լսել է կնոջը:

Այժմ, եկանք այն եզրահանգման, որ վարչապետը ոչ միայն Լֆիկի դեմ է պայքարելու, այլև տիկին Շողերի, ով, ինչպես հայտնի է, պահում է Լֆիկի տունն ու երեխաներին, կերակրում, հագցնում, լվանում-թափում. կողքից էլ Լֆիկ է պահում:

Ինչպես կավարտվի այս անհավասար մենամարտը, որին նաև կին է խառնված, երևի թե կուպրե կարասը չի օգնի: Մի Լֆիկ, մի Շողեր, մի շաքարավազ, և մի հատ էլ Կարեն Կարապետյան: Դեռևս վարչապետի ո′չ մարգարեական հորդորները, ո′չ մենամարտն արդյունք չեն տալիս. մնում է տնտեսական քոթակը:

NEWSPRESS.am