Սերժ Սարգսյանն ասել է՝ որ դեպքում կբացվի հայ-թուրքական սահմանը

Հայ-թուրքական սահմանի բացումը կարող է տեղի ունենալ Երևանի և Անկարայի փոխադարձ ցանկության դեպքում՝ առանց որևէ նախապայմանի: Այդ մասին «ՌԻԱ Նովոստի» գործակալությանը հայտնել է ՀՀ նախագահ Սերժ Սարգսյանը:

«Ես միշտ ասում եմ, գուցե դա արդեն ոչ պոպուլյար օրինակ է, որ յուրաքանչյուր հարսանիք կամ ընտանիքի կազմում պահանջում է երկուսի համաձայնությունը: Այստեղ չի կարելի ասել, որ հարցը 50 տոկոսով որոշված է. սա այդ դեպքը չէ: Այս պլանում մեզանից ոչինչ կախված չէ»,- «Ռուսաստանն այսօր» ՄԻԳ գլխավոր տնօրեն Դմիտրի Կիսելյովին տված հարցազրույցում ասել է պետության ղեկավարը:

Սարգսյանն ընդգծել է, որ Հայաստանն իր հերթին վաղուց է պատրաստ քայլեր ձեռնարկելու, որպեսզի հարաբերություններ հաստատվեն:

«Մինչև 2009 թվականը մեր որոշ ընկերներ նույնիսկ ասում էին, որ մենք բարդույթավորվում ենք Ցեղասպանության պատճառով, որ մենք պարզապես չենք ուզում թուրքերի հետ որևէ հարաբերություն ունենալ, քանի դեռ նրանք չեն ճանաչել Ցեղասպանությունը: Դուք հասկանում եք իմ՝ այնժամանակվա դրությունը, երբ ես եղա գրեթե ամբողջ աշխարհում, հանդիպեցի հայկական սփյուռքի ներկայացուցիչների հետ: Իսկ Փարիզում, Նյու-Յորքում, Լոս-Անջելեսում, Բեյրութում Հայաստանի նախագահի դեմ այդ երկրների հազարավոր հայ քաղաքացիներ դուրս եկան՝ պահանջելով չստորագրել արձանագրությունները: Ես աշխատեցի, ես հորդորեցի, ես խնդրեցի»,- ասել է Սարգսյանը:

«Արդյունքը՝ ստորագրեցինք: Նրանք իրենց պարտականությունները չեն կատարում: Ի՞նչ անել հետո: Ընդառաջել ու ասել. «Այո, եկեք անվտանգության գոտին տանք Ադրբեջանին», իսկ Թուրքիան կբացի սահմանը: Իսկ հետո՞: Երեք ամսից, 1 տարուց, 1,5 տարուց ինչ-որ խնդիր կլինի, նորից կփակի: Դա մեզանից կախված չէ»,- ասել է Սարգսյանը:

Սերժ Սարգսյանի խոսքով՝ դեռ 2008 թվականին Հայաստանը Թուրքիային առաջարկեց հրապարակայնացնել բանակցային գործընթացը, և արդեն 2009 թվականին կողմերը գնացին երկու արձանագրության ստորագրման:

«Եվ Ցյուրիխում ՄԱԿ-ի Անվտանգության խորհրդի մշտական անդամ-երկրների արտգործնախարարների մասնակցությամբ ստորագրվեցին այդ երկու արձանագրությունները: Բայց, ցավոք սրտի, որոշ ժամանակ անց հայտնի դարձավ, որ թուրքերը պատրաստ չեն վավերացնելու այդ արձանագրությունները, և փաստորեն, պատրաստ չեն Հայաստանի հետ առանց նախապայմանների հարաբերություններ հաստատել»,- ասել է նա:

«Նրանք սկսեցին նախապայմաններ առաջ քաշել՝ Հայաստանը թող Լեռնային Ղարաբաղին համոզի Ադրբեջանին հանձնել թեկուզ մեկ «օկուպացված շրջան», ինչպես իրենք են անվանում: Այսինքն՝ անվտանգության գոտու մի մաս: Եվ այդ ժամանակ թուրքերը պատրաստ կլինեն հարաբերություններ հաստատել, բացել սահմանը: Քանի որ մենք պայմանավորվել էինք, և այդ արձանագրություններում շատ հստակ նշված էր, որ հարաբերությունների հաստատումը պետք է լինի առանց որևէ նախապայմանի, մեր պատասխանն այսպիսին էր. «Ներեցեք, բայց այդ մասին պետք էր ասել մինչ ստորագրումը, այսինքն՝ բանակցային գործընթացի ժամանակ»: Դրանից հետո մեր և Թուրքիայի միջև որևէ հարաբերություն չկա: Պարզապես, եթե որևէ միջազգային ֆորումում մենք հանդիպում են, բարևում ենք միմյանց և վերջ»,- ասել է Սարգսյանը:

Նա հայտարարել է, որ ինքն ուզում է Հայաստանի և Թուրքիայի սահմանի բացումը. «Ուզում եմ, որ թուրք երիտասարդությունը հասկանա, որ ինքը մեղավոր չէ այն բանում, որ Օսմանյան Թուրքիայում տեղի է ունեցել Հայոց ցեղասպանությունը: Որովհետև իրականում ինչո՞վ է մեղավոր այսօրվա թուրք երիտասարդը: Հասկանո՞ւմ եք»,- ասել է նա: