Ծրագրվում է մեզանից խլել և Ադրբեջանին հանձնել Արցախը, ինչի դիմաց Ադրբեջանը խոստանում է նորից գրկախառնվել Ռուսաստանի հետ. Ժիրայր Սէֆիլյանի կոչը

Պատրաստվենք Ազգ-բանակ դառնալու և տեր կանգնելու մեր Հայրենիքին: Այդս մասին այսօր «Վարդաշեն» ՔԿՀ-ից ժողովրդին ուղղված կոչով դիմել է «Հիմնադիր խորհրդարանի» անդամ Ժիրայր Սէֆիլյանը: Կոչում, մասնավորապես, ասված է.

«Սիրելի՛ ժողովուրդ

Սարդարապատից մեկ դար անց մենք կրկին հայտնվել ենք սարդարապատային վիճակում:

Ռուսաստանը, Թուրքիան եւ Ադրբեջանը հետեւողականորեն քայլեր են ձեռնարկում ռուս-թուրքական օղակը հերթական անգամ մեր կոկորդին սեղմելու համար:

Նրանք ծրագրում են մեզանից խլել եւ Ադրբեջանին հանձնել Արցախը, ինչի դիմաց Ադրբեջանը խոստանում է նորից գրկախառնվել Ռուսաստանի հետ, ինչը պետք է ապահովի ռուս-թուրքական դաշինքի գերակայությունը տարածաշրջանում:

Բնականաբար՝ այս ծրագիրը նաեւ նախատեսում է ինքնիշխան Հայաստանի լիակատար գաղութացում, քանի որ ինքնիշխան Հայաստանը ոսկոր է նրանց կոկորդում:

Մինչ այս ծրագիրը քայլ առ քայլ իրականացվում է եւ դրա նպատակով Ադրբեջանը շարունակում է զինվել ու պատրաստվել պատերազմի, Հայաստանի դավաճանական ղեկավարությունը շարունակում է ճնշել ժողովրդի դիմադրական ոգին, զինաթափել եւ կեղեքել նրան: Ցեղասպանության վտանգի առջեւ կանգնած հայ մարդն իր երկրում զրկված է զենք ունենալու եւ ինքնապաշտպանության դիմելու իրավունքից: Անգամ այսօրվա օրհասական վիճակում սահմանամերձ մարզերի բնակիչներից շարունակում են առգրավել զենքը եւ նրանց պատասխանատվության ենթարկել դրա համար:

Ասվածի վերջին ապացույցը Ադրբեջանի աննախադեպ մասշտաբի զորավարժությունների ընթացքում եւ այդ պետության ղեկավարի ռազմատենչ հայտարարությունների ու կոնկրետ սպառնալիքների պայմաններում «Սասնա Ծուռ» Սեդրակ Նազարյանի՝ Սյունիքի մարզի Սպանդարյան գյուղում գտնվող հայրական տանը զենք եւ զինամթերք հայտնաբերելու պատրվակով կատարված վայրենաբարո խուզարկությունն էր, որը կազմակերպվել եւ իրականացվել էր այդ եւ շրջակա գյուղերի բնակիչների շրջանում վախ եւ հուսահատություն սերմանելու միտում ունեցող հոգեբանական գրոհի մեթոդներով:

Մենք սպասելու ժամանակ չունենք եւ չենք կարող հույսեր կապել մի ղեկավարության հետ, որը դավաճանաբար զինաթափում է ժողովրդին, նախատեսում է պայմանավորված պատերազմի միջոցով հանձնել ազատագրված տարածքները, իսկ զոհվող զինվորների թաղման ծախսերն ապահովագրել կեղեքված ժողովրդի վերջին հազար դրամը խլելու հաշվին:

Մենք պետք է պատրաստվենք պատերազմի եւ ինքնապաշտպանության՝ նաեւ գիտակցելով, որ ազգովին պատերազմին պատրաստ լինելը պատերազմը կանխելու միակ միջոցն է: Եվ այդ նպատակով ժողովուրդը պետք է պահանջի, որ վարչախումբը զինաթափելու փոխարեն զինի իրեն: Հակառակ պարագայում նա վերջնականորեն պետք է համարվի թշնամուն օժանդակող եւ դառնա ապստամբության ու դատաստանի թիրախ:

Ազգ-բանակի հիմքը զինված եւ պատրաստված ժողովուրդն է:

Պատրաստվենք Ազգ-բանակ դառնալու եւ տեր կանգնելու մեր Հայրենիքին:

Համոզված ենք, որ դեռ Ադրբեջանին ծնկի բերելու եւ Կուր-Արաքսյան հանրապետություն ստեղծելու ներուժ ունենք եւ կյանքի ենք կոչելու այդ ծրագիրը:

Անձամբ ես պատրաստ եմ գլխավորել «Սասնա Ծռերին» եւ այլ նվիրյալներին ու նրանց հետ միասին ստանձնել այս գործընթացի պատասխանատվությունը: