Զարուհի Փոստանջյանը տվեց Սերժ Սարգսյանի անունը. Գալուստ Սահակյանը հակադարձեց՝ մարդկանց վարկաբեկում ես

Զինծառայողների ընտանիքներին օգնելու նպատակով ստեղծվելիք հիմնադրամը պետք է համալրվի նախագահական ինստիտուտին տրամադրվող գումարների կրճատումից, ոչ թե ժողովրդից հավաքած գումարներից:  Այդ մասին Ազգային ժողովի նիստում ասաց «Ժառանգություն» խմբակցության ղեկավար Զարուհի Փոստանջյանը՝ անդրադառնալով կառավարության ներկայացած այն նախագծին, որով առաջարկվում է հատուցում վճարել այն զինծառայողների ընտանիքներին, ովքեր մահացել կամ հաշմանդամություն են ստացել մարտական գործողությունների, շփման գծում մարտական հերթապահության կամ հատուկ առաջադրանք կատարելու ժամանակ:

«Օրակարգը քննարկելիս նորից ներկայացվել է մի օրինագիծ, համաձայն որի՝ այս ապօրինի իշխանությունը մտնելու է մեր գրպանները և մեզանից օտարելու է 1000 դրամ: Կարծես թե 1000 դրամը մեծ փող չէ, բայց երբ 35 տոկոս բնակաչությունը գտնվում է աղքատության մեջ, ապա այս 1000 դրամն իրոք գումար է յուրաքանչյուր ընտանիքի համար: Եթե մենք խոսում ենք արդարությունից, եթե մենք խոսում ենք, որ մենք անհրաժեշտություն ունենք պատշաճ կերպով հոգալ մեր զինծառայողների խնդիրները, ապա ոչ թե պետք է նորից 1000 դրամ հավաքագրենք, այլ այս գումարը կա մեր պետական բյուջեում և այն առաջին հերթին պետք է կրճատվի նախագահական ինստիտուտին տրամադրելու գումարներից: Այդ գումարների միջոցով մենք պետք է այդ հիմնադրամը համալրենք»,- նշեց պատգամավորը:

Զարուհի Փոստանջյանի խոսքով՝ Ազգային ժողովում բազմաթիվ մարդիկ են հավաքված, ովքեր միլիոնավոր, միլիարդավոր հարստություն ունեն և հետևաբար այդ հիմնադրամում առաջին հերթին պետք է նրանք գումարներ մուտք անեն:

«Պարո′ն Սահակյան, Ձեզ անուններ ասեմ՝ Սերժ Սարգսյանն իր ողջ ընտանքիվ, առաջին հերթին նրանցից պետք է այդ գումարները գանձել հիմնադրամի համար, հետո նոր հասարակությունից գումարներ գանձել»,- դիմելով ԱԺ նախագահ Գալուստ Սահակյանին՝ ասաց պատգամավորը:

«Ի միջի այլոց, տիկին Փոստանջյան, ես որ թվարկելու լինեմ, որովհետև որևէ փաստ Ձեր ասածներում չեք ասում, առաջինը Ձեր անունը կտայի, հետո իմ անունը կտայի, հետո կողքինիդ անունը, հետո դրանք փաստարկներ չեն: Դրանք ընդամենը… փորձում ես մարդկանց վարկաբեկել, մարդկանց խնդիրները մի կողմ դնել, դա չի սազում խորհրդարանին»,- պատասխանեց Ազգային ժողովի նախագահը: