Հերիք է զբաղվել 1000 դրամի մուրացկանությամբ. Փոստանջյանի կարծիքով՝ գումարը հավաքվում է ընտրությունների համար

Սերժ Սարգսյանին նախընտրական շրջանի համար անհրաժեշտ է լրացուցիչ բյուջե, դրա համար էլ հարկային բեռն ավելացվում է 1000 դրամով: Այդ մասին Ազգային ժողովի նիստում ասաց «Ժառանգություն» խմբակցության ղեկավար Զարուհի Փոստանջյանը՝ անդրադառնալով կառավարության ներկայացած այն նախագծին, որով առաջարկվում է հատուցում վճարել այն զինծառայողների ընտանիքներին, ովքեր մահացել կամ հաշմանդամություն են ստացել մարտական գործողությունների, շփման գծում մարտական հերթապահության կամ հատուկ առաջադրանք կատարելու ժամանակ:

«Ազգային ժողովի քննարկմանն է ներկայացված մի օրինագիծ, որով մեր քաղաքացիների  հարկային բեռն ավելանալու է: Հարկային բեռի համար նախատեսված է յուրաքանչյուր աշխատող անձից գանձել 1000 դրամ, և իբրև թե այս 1000 դրամը պետք է ծառայի մեր զինվորների առողջության և հետագա ապաքինման համար, և նաև նրանց ընտանիքների համար, ում կորցրել ենք պատերազմական գործողություններում կամ զինված ուժերում տեղի ունեցող դեպքերի ժամանակ»,- նշեց Փոստանջյանը:

Ըստ պատգամավորի՝  այս հարկային բեռն ավելացվում է նախընտրական շրջանում. «Այդ շրջանում այսօրվա ապօրինի գործող իշխանություններին անհրաժեշտ է լրացուցիչ բյուջե, մասնավորապես՝ Սերժ Սարգսյանին: Նա փորձելու այսպիսի ապօրինի քայլով հավաքել այդ բյուջեն»:

Պատգամավորը կոչ արեց համերաշխություն ցուցաբերել հանրության հետ և գոնե այս պահին դեմ քվեարկել նախագծին, քանի որ հանրությունը չի ողջունում, ավելին՝ դատապարտում է այս նախագիծը:

«Այս օրինագիծը չպետք է արժանանա Ազգային ժողովի հավանությանը, պետք է դեմ քվեարկենք այս նախագծին»,- ասաց Փոստանջյանն ու հավելեց. «Հերիք է զբաղվել մուրացկանությամբ, այն էլ 1000 դրամ մուրալ մեր ժողովրդից»: