Հարցեր Պաշտպանության նախարարին՝ յուրաքանչյուր աշխատողից 1000 դրամ հավաքելու առաջարկի վերաբերյալ

Ազգագրագետ Հրանուշ Խառատյանը ֆեյսբուքյան իր էջում.

«Ես որոշ հարցեր ունեմ Պաշտպանության նախարարի՝ յուրաքանչյուր աշխատողից 1000 դրամ հավաքելու առաջարկի շուրջ: Հնարավոր է՝ ես սխալ տերմիններ օգտագործեմ, խնդրում եմ ներողամիտ լինել, զինվորական տերմինների հետ ծանոթությունս մակերեսային է:

Առաջարկի հիմքում ընկած է զինծառայողների կրած վնասների դիմաց փոխհատուցումներ վճարելու գաղափարը: Արդյո՞ք այս առաջարկը պայմանավորված է Հայաստանի՝ փաստացի պատերազմական իրավիճակում գտնվելով: Եվ արդյո՞ք զինծառայողների հնարավոր վնասների դիմաց նախատեսվող փոխհատուցումները պիտի ուղղվեն միայն պատերազմական կամ ճակատային կիսառազմական դեպքերի վնասներին: Եթե խոսքը զինվորական ծառայության ընթացքում կրած վնասների և մահվան մասին է, պե՞տք է տարբերակել պայմանագրային և պարտադիր զինծառայողներին: Պայմանագրային զինծառայողները վարձու աշխատողներ են: Պարտադիր զինծառայողները իրենց պարտքն են կատարում հայրենիքի առաջ: Ճգնաժամային իրավիճակներում /պատերազմ/ առաջանում է երրորդ խումբը՝ կամավորները: Որպեսզի հասարակության համար հասկանալի լինի, թե իրականում ում համար են հավաքվելու այս գումարները, պետք չկա՞ տարբերակել այդ խմբերը: Մյուս կողմից հրապարակված հասցեականություններում առկա են միայն սպաներ, ենթասպաներ և շարքայիններ բառերը: Բայց բանակում կան նաև քաղաքացիական աշխատողներ, հոգևորականներ, ովքեր նույնպես կարող են վնասներ կրել աշխատանքի ընթացքում: Եվ այսպես՝ հարցեր

– վարձու աշխատանք կատարող պայմանգրային զինծառայողները նույնպե՞ս պիտի 1000-ական դրամ տան իրենց աշխատավարձերից,

-վարձու աշխատանք կատարող և վնասված զինծառայողները պիտի փոխհատուցում ստանա՞ն,

– ճգնաժամային իրավիճակներում զինվորական պարտականություններ կատարող կամավորներները պիտի հաշվվե՞ն զինծառայողներ, և վնասներ կրելու դեպքում պիտի փոխհատուցում ստանա՞ն,

-Բանակում աշխատող/ծառայող հոգևորականները զինծառայողնե՞ր են, թե՞ վարձու աշխատողներ: Նրանք 1000-ական դրամ պիտի վճարե՞ն, և/կամ բանակում վնասվելու դեպքում փոխհատուցում պիտի ստանա՞ն,

-Բանակում սպասարկման վարձու աշխատանք կատարող քաղաքացիական աշխատողները բանակում մարմնական վնասվածքներ ստանալու դեպքում կարո՞ղ են ստանալ փոխհատուցում, օրինակ՝ բժիշկները, վարորդները /ապրիլյան պատերզմում ունեինք սպանված տարիքով վարորդ/, այլ,

-Տարբերություն կա՞ շտաբներում, Պաշտպանության նախարարությունում աշխատող զինծառայողների և ճակատային գծում գտնվող զինծառայողների դեպքերում,

-զինկոմիսարիատներում աշխատող զինծառայողները վնասվածք ստանալու դեպքում փոխհատուցում ստանալու՞ են,

-Եթե զինծառայողը բանակում վնասվածք է ստացել ոչ կանոնակրգային հարաբերությունների հետևանքով, նրան փոխհատուցում հասնու՞մ է /նրան բանակ են տարել և առնվազն «խաղաղության գծում» կամ «խաղաղության պահին» պետք է ապահովեն նրա ֆիզիկական անվտանգությունը/,

-բանակային ծառայության ընթացքում և ծառայության հետևանքով ձեռք բերված հիվանդությունների դեպքում փոխհատուցում պիտի նախատեսվի՞,

– զորավարժությունների ընթացքում վնասվածք ստացող զինծառայողները փոխհատուցում ստանալու՞ են:

Այլ հարցերը ողջունելի են»: