Հենրիխ Մխիթարյանը՝ ազգային հավաքականի նորանշանակ մարզչի մասին

Արթուր Պետրոսյանն ինձ համար եղել է Հայաստանի հավաքականի պատմության լավագույն խաղացողներից մեկը, եթե ոչ՝ լավագույնը: Մշտապես հպարտացել եմ նրանով: Այդ մասին այսօր՝ UNICEF-ի կողմից  ՀՀ-ում բարի կամքի ազգային դեսպան նշանակվելուց հետո, լրագրողների հետ զրույցում ասաց Հայաստանի ազգային հավաքականի ավագ Հենրիխ Մխիթարյանը՝ խոսելով նորանշանակ մարզչի մասին:

«Փոքր տարիքում միշտ աջակցություն եմ ստացել նրա կողմից: Այս օրերին նրա հետ աշխատելով՝ մեծ տպավորություններ ունեմ, քանի որ նա շատ լավ է հասկանում ֆուտբոլը: Կարծում եմ՝ միասին կարող ենք հաջողությունների հասնել: Ինձ համար միշտ պատիվ է այսպիսի մասնագետների հետ աշխատելը: Գիտեմ՝ նա կարող է հավաքականին ինչ-որ բան տալ»,- ասաց Մխիթարյանը:

Խոսելով իր մարզավիճակի մասին՝ կիսապաշտպանն ասաց, որ թեև իր վերջին հանդիպումը եղել է «Ֆեներբահչեի» դեմ խաղը, որին նա մասնակցել է ընդամենը 30 րոպե, սակայն, ըստ ֆուտբոլիստ, դա խոչընդոտ չէ:

«Կարևորը ցանկությունն է, ոչ թե մարզավիճակը: Եթե ֆուտբոլիստն ունի ցանկություն՝ կարծում եմ, որ մարզավիճակն անցնում է երկրորդ պլան: Կփորձեմ ամեն ինչ անել, որպեսզի օգտակար լինեմ հավաքականին: Գիտեմ, որ սպասելիքները շատ մեծ են»,- ասաց Մխիթարյանը:

Հայաստանի ազգային հավաքականի ավագի խոսքով՝ թեև ինքը Մոնտենեգրոյի ընտրանուն լավ ծանոթ չէ, սակայն դեռ ժամանակ կա նրանց խաղին ծանոթանալու և այն վերլուծելու համար: