Դիզվառելիքի և բանանի նոր ներկրողներ ունենք. ՊԵԿ նախագահ

25 տարի խոշոր բիզների ներկայացուցիչ եմ եղել: Շատ լավ գիտեմ բիզնեսի խնդիրները և այն պրոբլեմները, որոնք պետք է լուծել, որպեսզի բիզնեսի դաշտը բացվի, այնպես որ՝ քայլերը կտեսնեք: Պայքարելու եմ ստվերի դեմ, կպայքարեմ, կտեսնեք: Կա′մ պիտի պայքարենք, կա′մ չպիտի պայքարենք: Ես միտված եմ պայքարելու: Այդ մասին այսօր Ազգային ժողովում լրագրողների հետ զրույցում ասաց Պետական եկամուտների կոմիտեի նախագահ Վարդան Հարությունյանը:

Լրագրողների դիտարկմանը, թե, օրինակ, խոշոր հարկատու «Ալեքս Գրիգ» ընկերությունը 2 միլիարդ դրամով նվազեցրել է հարկերը, դա՞ է պայքարի արդյունքը, ՊԵԿ նախագահը պատասխանեց, թե հնարավոր է՝ շրջանառությունն է իջել. «Ինչի՞ եք դուք տենց գնահատական տալիս: Բերեք հասկանանք՝ հարկերն ինչի՞ արդյունքում են իջել. նվազե՞լ է շրջանառությունն ու ներմուծումները, թե՞ դա ստվեր է: Եթե ստվեր է՝ պայքարելու եմ, եթե ընդամենը շրջանառություն է, ապա այլ խնդիր է»,- ասաց ՊԵԿ նախագահը:

Ճշգրտող հարցին, թե ստուգումնե՞ր են եղել և դրանց արդյունքում է պարզվել, որ հարկերի պակասումը շրջանառության նվազման հետևա՞նք է, Հարությունյանն ասաց, որ այս պահին պատասխանել չի կարող: Պատասխան նա խոստացավ տալ վաղը:

Մեկ այլ հարցի, թե արդյոք վարչապետի այն հայտարարությունից հետո, թե ով ինչ ապրանք ուզում է, կարող է ներկրել, «ոգևորվողներ» եղե՞լ են, Հարությունյանն ասաց, որ ունենք դիզելային վառելիքի և բանանի նոր ներկրողներ: Թե ովքեր են նրանք, ՊԵԿ նախագահը դժվարացավ պատասխանել և նկատեց, որ ներկրվել է 1-2 մեքենա ապրանք, իսկ խոչընդոտներ չեն եղել: