Վճռաբեկ դատարանի նախագահի հոր կինը ներողություն է խնդրել փաստաբան Լիանա Բալյանից

Փաստաբան Լիանա Բալյանը ֆեյսբուքյան իր էջում գրել է.

«Սա թող օրինակ ծառայի բոլոր նրանց, ովքեր կհամարձակվեն մի օր քնից արթնանալ և որոշել, որ կարող են «Թոք շոուներով» անհիմն զրպարտել և վիրավորել փաստաբաններին…

03.11.2016թ. Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանը (նախագահությամբ դատավոր` Ռ. Ներսիսյանի) քննության առնելով թիվ ԵԿԴ4280/02/14 քաղաքացիական գործն ըստ իմ հայցի ընդդեմ Լյուսյա Հակոբյանի` վիրավորանքի և զրպարտության միջոցով պատվին, արժանապատվությանը և գործարար համբավին պատճառված վնասների հատուցման պահանջի մասին բավարարել է, հաստատել է հաշտության համաձայնությունը, և Լյուսյա Հակոբյանը ներողություն է խնդրել ինձանից` 01.10.2014թվականին «Կենտրոն» հեռուստաընկերությունում «Քո Սխալը» հեռուստաեթերով` հրապարակայնորեն, վիրավորանքի և զրպարտության միջոցով փաստաբան Լիանա Բալյանի պատիվը, արժանապատվությունը և գործարար համբավը արատավորելու համար:

Լյուսյա Հակոբյանը ընդունել է, որ ինձանից ստացել է 695 000 ՀՀ դրամ, որպես տարածքի վարձակալության գումար: Ես ընդունել եմ Լյուսյա Հակոբյանի ներողությունը և հրաժարվել եմ 3000000/երեք միլիոն/ ՀՀ դրամ պահանջից, կնքել հաշտություն, քանի որ ինձ իրենից իրականում այդ տիկնոջից գումար պետք չէր, գումար էլ ստանայի տալու էի բարեգործությանը…

Նշեմ, որ հայցով իմ միջնորդությամբ կալանք էր դրվել Լյուսյա Հակոբյանի ամբողջ գույքի և դրամական միջոցների վրա:

Ես 05.03.2013թվականին Երևան քաղաքի, Սայաթ-Նովա 23շենքի, թիվ 26 տարածքի սեփականատեր Լյուսյա Տիգրանի Հակոբյանի հետ կնքել էի տարածքի վարձակալության պայմանագիր և 7 ամիսների ընթացքում վճարել էի 695 000 ՀՀ դրամ: Տարածքը օգտագործվել է որպես փաստաբանական գրասենյակ: Սակայն, քանի որ տարածքը հարմար չէր և մի քանի անգամ ջուր լցվեց ու փչացվեց իմ գրասենյակային գույքը, ես իմ փաստաբանական գրասենյակը տեղափոխեցի Արշակունյաց հասցե:

Լյուսյա Հակոբյանը շատ զայրացավ և սպառնաց, որ իրեն գումարներ տամ/ խոսքը հազարավոր դոլարների մասին էր…/ թէ չէ ինձ «աշխարհով մեկ խայտառակ կանի…»: Եվ տեսնելով, որ գումարներ իրեն չեմ վճարում և իրենից չեմ վախենում, գնաց և «Քո Սխալը» հեռուստաեթերով` հրապարակայնորեն իմ հասցեին վիրավորանքներ տեղաց և զրպարտեց ասելով, որ «… փաստաբան Լիանա Բալյանը օգտագործել է տարածքը, գումարներ չի տվել իրեն ու փախել է…»: Իսկ «Կենտրոն» հեռուստաընկերությունում «Քո Սխալը» հեռուստաեթերի լրագրողները չնայած իմ բոլոր փաստարկներին՝ լրագրողական հետաքննություն չկատարեցին և մեծ ուրախությամբ եթեր տվեցին հաղորդումը, մտածելով միայն իրենց «ռեյտինգի» համար, որ փաստաբան են խայտառակ անում:

Ինչևէ` «Կենտրոն» հեռուստաընկերությունը «Քո Սխալը» հաղորդաշարը փակեց, էլ եթեր չի հեռարձակվում, իսկ Լյուսյա Հակոբյանը, որը ՀՀ Վճռաբեկ դատարանի նախագահ` Արման Մկրտումյանի հոր` Յուրա Մկրտումյանի երկրորդ կինն է, երկու տարի տեղի ունեցած դատերից հետո հրապարակային ներողություն խնդրեց ինձանից»:

(Լուսանկարում Լյուսյա Տիգրանի Հակոբյանն է)