Օդից կախված Բալասանյանը

Ասում են` Գյումրիի նորաթաթախ քաղաքապետը հեռանալու է «իր դիմումի համաձայն», «ընթացքի մեջ են» հիվանդությունը, ակնհայտ ախտանշանները. Աստված մի արասցե, որ «մահացու հիվանդությունների»  աստղաբույլ հայտնաբերեն՝ կարճ ժամանակահատվածում:

Չնայած բոլոր չարորակ և «մահացու հիվանդությունները» հայտնվում են «հանկարծակի»:

Բոլորն են հիշում, որ Գյումրիում Բալասանյանին «երեսի զոռով» անցկացրին. է′լ բոնուսներ, է′լ չգիտես ինչեր, է′լ անհասկանալի հաշվարկներ. ՀՀԿ-ն ամեն ինչ արեց, որպեսզի Բալասանյանը մնա իշխանության:

Իրոք, Գյումրիում ՀՀԿ-ն շատ աշխատեց, ու այսօր էլ մտածում են՝ իսկ ինչո՞ւ, չէ՞ որ կարելի էր հասնել արդյունքի, սակայն պակաս ջանքեր գործադրելու կամ առանց ավելորդ աճպարարության:

Ասում են՝ ՀՀԿ-ում մի ամբողջ շաբաթ են մտածել ու «հայտնագործել» բոնուսային համակարգը, հայտնագործումից հետո մի 10 օր կարողացել են քնել: Այլևս այդպես չեն վարվելու. հոգնել են:

Կարճ ասած՝ եթե Բալասանյանը հնարավորություն չունի անգամ ինքն ընտրվելու, ապա ինչպե՞ս է օգնելու ապստամբական հովերով հայտնի Գյումրին ՀՀԿ-ականացնելու գործին:

2017թ.ընտրությունները հեռու չեն. ՀՀԿ-ն հավաքում է իր բոլոր ուժերը՝ հաղթահարելու հերթական ընտրությունները, այնպես որ՝ Բալասանյանը սխալ թույլ տվեց՝ չընտրվել-ընտրվելով: Դա կլինի լավագույնը, եթե Բալասանյանը պարզապես ինչ-որ «անհայտ-մահացու հիվանդություն» ստանա, կարող է պարզապես դուրս ընկնել իշխանական էշելոնից, և բացի մտերիմներից, եթե պահպանվեն իշխանազրկության պայմաններում, նրան որևէ մեկը դժվար թե հիշի, թե եղել է Բալասանյան, անգամ քաղաքապետ է եղել Բալասանյանը և անփառունակ անհետացել է իշխանական թատերաբեմից՝ ընտրաանկարողության պատճառով:

Այժմ Բալասանյանը ո′չ գյումրեցիներինն է, ո′չ ՀՀԿ-ինը. վերջապես նա մնացել է ինքն իր հետ և կարող է հանգիստ գարեջուր խմել:

NEWSPRESS.am