Այ տենց քոքվածն ա. Սևանի հոգեբուժարանի տնօրենից դժգոհում է աշխատակիցը

Սևանի հոգեբուժական հիվանդանոց ՓԲԸ-ում վերջին շրջանում խիստ անհանգիստ մթնոլորտ է: Դեռևս չեն մարել ՏԻՄ հետընտրական կրքերը Գեղարքունիքի մարզի Վարսեր գյուղում, որտեղ Սևանի հոգեբուժարանի տնօրեն Գագիկ Կարապետյանի խնամին չընտրվեց համայնքապետ: Այժմ էլ վերադասավորումներ են տեղի ունենում հոգեբուժարանում:

Հիշեցնենք, որ NEWSPRESS.am-ի թղթակցին ահազանգել էր Սևանի հոգեբուժարանի բուժաշխատողներից մեկը, ով չէր ցանկացել անունը հայտնել և ասել էր, որ Սևանի հոգեբուժարանի տնօրեն Գագիկ Կարապետյանը սատարում էր գործող գյուղապետ Զավեն Հարությունյանին, ում հետ ունի խնամիական կապեր:

Հոկտեմբերի 2-ի ՏԻՄ ընտրություններից մեկ շաբաթ առաջ Սևանի հոգեբուժարանի տնօրենը հավաքել է Վարսեր համայնքից իր աշխատակիցներին և նրանց ստիպել է ստորագրել աշխատանքից ազատվելու դիմումների տակ, որտեղ օր և ամսաթիվ գրված չի եղել, այն պայմանով, որ եթե գործող գյուղապետը չհաղթի ընտրություններում, ապա նրանց աշխատանքից ազատելու է: Եվ քանի որ ընտրությունները չեղարկվել էին ու հոկտեմբերի 23-ին տեղի էին ունեցել ՏԻՄ ընտրություններ և ընտրվել էր գործարար Հուսիկ Սեդրակյանը, ապա Գեղարքունիքի մարզի Վարսեր համայնքից Սևանի հոգեբուժարանում աշխատող շուրջ 20 քաղաքացու՝ տեխնիկական աշխատակիցների և բուժաշխատողների, բանավոր հրահանգվել էր դուրս գալ աշխատանքից, ինչին աշխատողները չէին ենթարկվել:

Այսօր NEWSPRESS.am-ի թղթակցին զանգահարեց Սևանի հոգեբուժարանի նույն աշխատակիցը՝ նշելով, որ Գագիկ Կարապետյանը թեև բանավոր է ասել, որ Վարսեր համայնքի բնակիչները դուրս գան գործից, սակայն չի համարձակվում գրավոր աշխատանքից հեռացնել և որոշ վարսերցիների աշխատանքային պայմաններն այնպես է բարդացրել, որ ինքնակամ դուրս գան աշխատանքից:

«Այ տենց քոքվածն ա»,- փոխանցեց աղբյուրը՝ հավելելով, որ աշխատակիցները ցանկանում են խոսել տնօրենի հետ, սակայն նա չի ընդունում աշխատակիցներին:

Նա նաև նշեց, որ Կարապետյանը տեսախցիկներ է տեղադրել ամեն տեղ, անգամ «տերևի շարժին հետևում է», թե որ աշխատողը երբ եկավ, երբ գնաց, որպեսզի սխալի դեպքում հեռացնի աշխատանքից: Աշխատողները խուճապի մեջ են, թեև, ըստ աղբյուրի, միշտ էլ աշխատանքային կարգապահություն ունեցել են:

Բացի այդ, մեր աղբյուրը հաղորդեց, որ լուրեր են պտտվում, ըստ որոնց՝ Գագիկ Կարապետյանը որոշել է փոխել իր տեղակալին՝ Կոլյա Հովեյանին և նրա տեղը նշանակել Վարսեր գյուղի ղեկավար չընտրված խնամուն՝ Զավեն Հարությունյանին:

Երբ լուրը հաղորդել են Կոլյա Հովեյանին, վերջինս վատացել է. նա սրտի վիրահատություն է տարել, շտապօգնություն են կանչել. «Թաղեմ տանցը, խեղճ մարդուն էդ օրը քցին»,- ասաց մեր զրուցակիցը:

Մենք պարզաբանման համար դիմեցինք Գագիկ Կարապետյանին: Վերջինս լսելով բուժաշխատողի հնչեցրած մեղադրանքները՝ ասաց, որ դրանք չեն համապատասխանում իրականությանը: