Հայաստանում ամուսնությունների թիվը նվազել է. ԱՎԾ

2016թ. հունվար-սեպտեմբերին 2015թ. հունվար-սեպտեմբերի համեմատ 7.9%-ով նվազել են գրանցված ամուսնության դեպքերը և կազմել 12 088, իսկ ամուսնության ընդհանուր գործակիցը, 1 000 բնակչի հաշվով, նվազել է 0.4 պրոմիլային կետով և կազմել 5.4‰: Այս մասին տեղեկացնում են ազգային վիճակագրական ծառայությունից:

2016թ. հունվար-սեպտեմբերին արձանագրված ամուսնալուծության դեպքերը 2015թ. հունվար- սեպտեմբերի համեմատ նվազել են 4.2%-ով և կազմել 2 682, իսկ ամուսնալուծության ընդհանուր գործակիցը, 1 000 բնակչի հաշվով, ինչպես և 2015թ. նույն ժամանակաշրջանին, կազմել է 1.2 ‰: ՀՀ-ում 2016թ. հունվար-սեպտեմբերին գրանցված 1 000 ամուսնությունների համեմատ արձանագրվել է ամուսնալուծության 222 դեպք` 2015թ. հունվար-սեպտեմբերին արձանագրված 213-ի համեմատ:

ՀՀ բնակչության տեղաշարժերը ՀՀ կառավարությանն առընթեր ՀՀ ոստիկանության անձնագրային և վիզաների վարչության կողմից ստացված ՀՀ բնակչության պետական ռեգիստրի տեղեկատվական համակարգի վարչական հաշվառման համաձայն, 2016թ. հունվար-սեպտեմբերին արձանագրվել է բնակչության տեղաշարժերի հաշվառման և հաշվառումից դուրս գրման 43 193 գործողություն:

Հաշվառման գործողություններից 73.6%-ն իրականացվել են ըստ ՀՀ բնակավայրերի հասցեների (այդ թվում՝ 81.3%-ը կազմել են ներհանրապետական տեղաշարժերը), իսկ 26.4%-ը՝ օտարերկրյա պետություններում իրենց բնակության հասցեների: Հաշվառումից հանելու գործողություններից 64.1%-ն իրականացվել են ըստ ՀՀ բնակավայրերի հասցեների, 9.5%-ը՝ օտարերկրյա պետության, իսկ 26.4%-ի դեպքում բնակավայրի հասցեները նշված չեն եղել: