Վարդան Այվազյանն օլիգարխիայից հեռու է քշում չորքոտանիների ստվերը

Վերջին շրջանում ՀՀԿ պատգամավոր Վարդան Այվազյանը հաճախ է հայտնվում մամուլի էջերում. ուշադրության կենտրոնում պատգամավորի լեզվամտածողության արգասիքն է:

Ինչպես հայտնի է, լեզվի միջոցով հնարավոր է նույն միտքը տարբեր տոնայնությամբ արտասանել՝ ձևավորելով կա′մ դրական, կա′մ բացասական ազդեցություն: Անզուսպ պահվածքը, եթե անգամ ճշմարտություն է փորձում մատուցել, հակառակ ազդեցությունն է ունենում:

Թեկուզ՝ «ով բիզնես չունի, հայվան է» արտահայտությունը: Երևի Վարդան Այվազյանը փորձել է կարևորել օլիգարխիան և այս խավից հեռու քշել խեղճ չորքոտանիների ստվերը, որը բազմակի օգտագործած ծամոնի նման կպել է այս խավից ու չի էլ պոկվում: Ստացվում է, թե չէ, այլ հարց է, պատգամավորը կարող է կրկին փորձել:

Լուրեր են շրջանառվում, որ ՀՀԿ Գերագույն մարմնի նիստի ժամանակ միջամտել է վարչապետի՝ գազի իջեցման վերաբերյալ հայտարարությանը, թե «սակագին իջեցնել կամ բարձրացնելը կառավարության գործառույթների մեջ չի մտնում»։

Հայտնի չէ, թե ինչու է ՀՀԿ ներկայացուցչին այդքան անհանգստացրել գազի գնի հնարավոր նվազեցումը. եթե Կարեն Կարապետյանը լինելով «գազի մարդ»՝ հասկանում է, որ հնարավոր է գազի գնի նվազեցում, ապա անհասկանալի է, թե Վարդան Այվազյանի սիրտն ինչո՞ւ է մռմռում գազի բարձր գնի նվազման համար, հատկապես հայտնի է, որ սպառողների համար գազի գինը կրկնակի բարձր է սահմանի գնից:

Կա′մ Վարդան Այվազյանը հանուն սկզբունքի Կարեն Կարապետյանի նախկին աշխատավայրից «այրված է», կա′մ օլիգարխների շահերն է պաշտպանում: Մամուլում շատ է խոսվում, որ օլիգարխիկ գործարանները ոչ միշտ են իրենց օգտագործած գազի համար վճարում: Երևի սա էլ չորքոտանիների ստվերն օլիգարխիայից հեռու քշելու յուրօրինակ փորձ է:

Ինչ վերաբերում է «կարմիր դիպլոմավոր գրուզչիկ» արտահայտությանը, որն ի դեպ վերաբերում է հենց իր անձին, նշենք, որ յուրաքանչյուրիս կյանքում մութ ու անցանկալի էջեր կան, սակայն փորձում ենք այդ էջը փակել և առաջ անցնել, քանզի մշտապես հետ նայելով՝ մնում ենք անցյալում, այս դեպքում՝ գրուզչիկ:

Կարճ ասած` ինչպես Վիկտոր Համբարձումյանն էր ասում՝ տիրապետեք հայոց լեզվին: Ենթադրվում է, որ հայ մեծ գիտնականը նաև Վարդան Այվազյանին նկատի ուներ:

NEWSPRESS.am