Աշոտ Գրիգորյանը հորդորում է չվախեցնել «Նաիրիտի» ներդրողներին

«Նաիրիտ» գործարանի վերաթողարկման վերաբերյալ առաջարկներ է ներկայացրել EU-Asia Business Finance Center Holding-ի նախագահ Աշոտ Գրիգորյանը, սակայն օրերս Ազգային ժողովում վարչապետ Կարեն Կարապետյանը «Նաիրիտի» վերագործարկման վերաբերյալ նշեց, որ կոնկրետ ներդրումների շուրջ առաջարկություններ դեռևս չկան, և պետք է նաև էներգակիրների վերաբերյալ 10 տարվա կանխատեսումներ ունենալ:

NEWSPRESS.am-ին «Նաիրիտի» վերաթողարկման առաջարկությունների փաթեթ ներկայացրած՝ EU-Asia Business Finance Center Holding-ի նախագահ Աշոտ Գրիգորյանը մանրամասնեց, որ «Նաիրիտի» վերաթողարկման առաջարկությունից հետո ստիպված է եղել պաշտոնական նամակ գրել վարչապետին և հորդորել գրավոր պատասխանել նամակներին, որպեսզի ստիպված չլինեն վարչապետի` ԱԺ-ում հնչեցրած ելույթներին արձագանքելու:

«Կարեն Կարապետյանին առաջարկել եմ երկուստեք առավել պատասխանատվությամբ մոտենալ «Նաիրիտի» վերաթողարկման հարցին: «Նաիրիտի» վերաթողարկման շուրջ պատրաստվել է ամենաբարձր մասնագիտական և արհեստավարժ փաստաթուղթը՝ հենց ՀՀ կառավարության պատրաստած ծրագիրն է, որը մեկ տարի առաջ ներկայացվել է Ազգային ժողով, և հենց այդ ծրագիրը մենք հիմք ենք ընդունել: Այսինքն՝ մենք շատ զարմանքով ստիպված ենք նշելու, որ սեփական կառավարության ծրագիրը գուցե Ձեզ չեն ներկայացրել, այդ դեպքում թույլ տվեք մեզ զարմանալ»,- ասաց Աշոտ Գրիգորյանը:

Գործարարը նաև հավելեց, որ այսօր՝ հոկտեմբերի 25-ին, վարչապետին արդեն փոխանցվել է իր նամակը, որտեղ նշված է Հայաստանի կառավարության կողմից պատրաստված հիանալի ծրագիրը՝ սկավառակի վրա. «Այնպես որ՝ «Նաիրիտի» վերաթողարկման վերաբերյալ ես կարծում եմ՝ կա սպառիչ պատասխան, և այլևս դեմագոգիայի տեղ, կարծես թե, չունենք երկուստեք»:

Գործարարը նաև անդրադարձավ էներգակիրների վերաբերյալ վարչապետի կողմից հնչեցված կանխատեսումների խնդրին, նշեց, որ իր համար տարօրինակ է այդ հայտարարությունը, որտեղ նշվում է, որ սպասում են էներգակիրների 10-ամյա կանխագուշակումների վրա հիմնված քլորոպրենային կաուչուկի արտադրություն, ապա նաև արտադրության առաքման ծրագիր:

«Կներեք, եթե Դուք չլինեիք էներգետիկայի ոլորտում աշխատած անձնավորություն, եթե Դուք լինեիք էներգետիկայի նախորդ նախարարի նման՝ գիտելիքներից զուրկ անձնավորություն՝ ես կփորձեի չպատասխանել և արհամարհել Ձեր հարցը, սակայն Ձեր պարագայում ես շատ կարճ կպատասխանեմ. հարգելի′ պարոն Կարապետյան, Դուք կարո՞ղ եք կանխագուշակել ոչ թե 10, այլ մեկ տարվա կտրվածքով գազի կամ էլէներգիայի գները և այդ կանխագուշակության վրա պլաններ կառուցել, խոսել էներգակիրների գնի իսկության մասին: Չե՞ք կարծում, որ էներգակիրների կանխագուշակության վերաբերյալ Ձեր հարցն աբսուրդի ոլորտից է»,- վարչապետին հարց է ուղղում գործարարը՝ հավելելով, որ եթե էներգակիրների գինը տատանվում է, ապա քլորոպրենային կաուչուկի գինը ևս տատանվում է. եթե էներգակիրների գինը բարձրանա, կաուչուկի գինը ևս կբարձրանա:

Ա. Գրիգորյանը հորդորում է վարչապետին՝ չվախեցնել ներդրողներին և հնարավորություն տալ վերագործարկել «Նաիրիտը»: Նա նաև վստահեցնում է, որ իրենց պայմանների բավարարումից հետո, «Նաիրիտն» աշխատելու է, սակայն կա մեկ վերապահում: Ներդրողները մտադիր չեն վճարելու «Նաիրիտից» նախկինում կատարված գողությունը և դրա հիման վրա առաջացած ամեն տեսակ պարտքերը. կատարված գողության նույնիսկ մեկ տոկոսը ներդրողները չեն փակելու:

«Սա սկզբունքային հարց է, մենք դեմ ենք կոռուպցիային ու թալանին և սեփական ժողովրդի ունեցվածքի գողությանը: Մենք ձեզ հետ միասին պետք է ստեղծենք նոր հասարակություն և չենք կարող ուչենք պատրաստվում ստեղծել նոր հասարակություն՝ հին գողություններն արդարացնելու և պարտակելու համար: Այնպես որ՝ եթե մեզ համար առաջին պայմանը կատարվում է և գործարանը մեզ տրվում է մեկ եվրոյով, մենք մնացած պայմանները պատրաստ ենք ձեզ հետ քննարկելու և վերաթողարկելու գործարանը»,- վստահեցրեց Ա. Գրիգորյանը:

Նա նաև չբացառեց «Նաիրիտի» վերաթողարկումից հետո հնարավոր լոգիստիկ խնդիրների առաջացումը, քանի որ կաուչուկի արտադրության ծավալները մեծ են լինելու, և արտահանումը-տեղափոխումն իդեալական կազմակերպելու համար տեղափոխությունը պետք է կազմակերպել. «Մենք մեր հոլդինգի մեջ ունենք ընկերություններ, որոնք հենց այդ խնդիրները լուծելու համար են ներգրավված»:

Աշոտ Գրիգորյանը նաև հաղորդեց, որ նախօրեին հանդիպում է ունեցել Սլովակիայի կառավարության կողմից հրավիրված՝ Մետաքսե ուղու համաշխարհային ընկերության ֆոնդի նախագահ, Չինաստանը ներկայացնող պարոն Դավիթ Կիանի հետ, և նա բացի Իրան-Հայաստան-Սլովակիա Մետաքսի ճանապարհի համագործակցությունից, մեծ հետաքրքրություն է ցուցաբերել նաև «Նաիրիտի» վերաթողարկման կոնսորցիումին անդամագրվելու հարցում:

«Պարոն Կիանը հայտարարեց, որ շատ հետաքրքրական է գտնում «Նաիրիտի» վերաթողարկմանը մասնակցելու մի պայմանով, որ իրենց համապատասխան ներդրումների դիմաց իրենք իրավունք ունենան «Նաիրիտի» արտադրանքը Չինաստան արտահանելու: Ես պարոն Կիանին հայտնեցի, որ ճիշտ մեր արտադրությունից Շանհայ քաղաքն ունի համատեղ ձեռնարկություն՝ «Նաիրիտ երկուսը», որին ի պատասխան՝ պարոն Կիանը հայտարարեց, որ տեղյակ են, սակայն կաուչուկի կարիքներն այդ գործարանը չի ծածկում և շատ ավելի մեծ ծավալներ կարելի է վաճառել Արևելյան Ասիայում»,- ասաց նա՝ շեշտելով, որ իրենց հոլդինգի անդամների քանակը գնալով ընդլայնվում է, և հետաքրքրությունը Հայաստանի նկատմամբ՝ մեծանում:

«Մնում է խնդրել Հայաստանի նորաստեղծ կառավարությանը՝ եթե չեն օգնելու «Նաիրիտի» վերաթողարկման մեր գործին, ապա գոնե բարի լինեն չխանգարել: Պարո′ն վարչապետ, մի խանգարեք ներդրողներին վերականգնելու մեծ ռազմավարական նշանակություն ունեցող՝ Հայաստանի քիմիական արդյունաբերությունը, իսկ եթե կարող եք օգնել՝ դա Ձեր պարտքը համարեք»,- ասաց նա:

Ինչ վերաբերում է Մետաքսե ճանապարհի վերաբերյալ քննարկումներին, ապա օրերս Վերոնայում անցկացվել է ԵՄ-Եվրասիական միություն խոշորագույն 5-րդ ֆորումը, որին մասնակցում էին Իտալիայի նախկին վարչապետ, նախագահ Ռոմանո Պրոդին, Իտալիայում առաջին բանկը համարվող «Ինտեսա» բանկի նախագահ Անտոնիո Ֆալիկոն, «Ռոսնեֆտի» նախագահ Իգոր Սեչինը: Քննարկումներին զգալի տեղ էր հատկացվել Մետաքսե ճանապարհի խնդրին, որտեղ Աշոտ Գրիգորյանը ներկայացրել է նոր մետաքսե ուղու վերաբերյալ ծրագիր:

«Եվրասիական միության նախարար Տատյանա Վալովայան մեծ հետաքրքրություն հայտնեց այս նոր ուղու շուրջ և ուղղակի ողջունեց ծրագիրը և որպես Եվրասիական միության նախարար՝ ինքն ամեն ինչ կանի Հայաստան-Իրան-Վրաստան-Սլովակիա ուղու մեջ առաջարկությանը Մոսկվայի կողմից սատարելու հարցում»,- ամփոփեց Աշոտ Գրիգորյանը: