Չինաստանը պատրաստ է միանալու Ռուսաստանին՝ ԱՄՆ-ի դեմ համագործակցության հարցում. չին փորձագետ

Ներկայացնում ենք «ԵՄ Եվրասիական միություն» հինգերորդ ֆորումի (Վերոնա, 20-21 հոկտեմբեր) ընթացքում հնչած ամենահետաքրքրական ելույթներից հատվածներ:

Ֆորումի ընթացքում շատ հետաքրքիր մտքեր արտահայտեց չինացի փորձագետ Սուն Հունբինը: Նախ ֆորումի մտքերի փոխանակման ժամանակ նա հետաքրքրություն ցուցաբերեց «ԵՄ-ԱՍԻԱ ԲՖԿ» Հոլդինգի ծրագրերի նկատմամբ: Պարոն Սունը, պարզվեց, որ մեկ ամիս առաջ եղել է Հայաստանում և ծանոթ է նրա խնդիրներին:

Փորձագետը ողջունեց Հայաստանին միջազգային համագործակցության մեջ ներգրավելու՝ «ԵՄ-ԱՍԻԱ ԲՖԿ» Հոլդինգի ցանկությունը: Սունը հատկապես հետաքրքրված էր Չինաստան-Իրան-Հայաստան-Սլովակիա նոր «Մետաքսե ուղու» շուրջ համագործակցության առաջարկով: Լինելով չինական ներդրող և ֆինանսավորող ընկերությունների հետ կապված բարձրաստիճան մենեջեր՝ նա վստահություն հայտնեց «ԵՄ-ԱՍԻԱ ԲՖԿ» Հոլդինգի  ծրագրերի ֆինանսավորմանը մասնակցելու հարցում:

«ԵՄ-ԱՍԻԱ ԲՖԿ» Հոլդինգի նախագահ Աշոտ Գրիգորյանը մեզ հետ զրույցում ասաց, որ պայմանավորվածություն է ձեռք բերվել մոտակա ժամանակահատվածում հանդիպում անցկացնել Բրատիսլավայում և համատեղ այց Հայաստան՝ չինացի ներդրողների խմբի հետ միասին:

Չափացանց հետաքրքիր էր Սուն Հունբինի ելույթի մասը՝ նվիրված գեոքաղաքական արդի խնդիրներին: Ըստ նրա՝ Չինաստանն արդեն պատրաստ է միանալու Ռուսաստանին ԱՄՆ-ի դեմ համագործակցության հարցում: Մինչ այսօր Չինաստանը զերծ է մնացել նման մտքից, քանի որ հստակ պատկերացրել է դրա հետևանքները մի կողմից և պատրաստ չի եղել նաև դրան տնտեսապես:

Այսօր, ըստ փորձագետի, իր երկիրն արդեն լիովին պատրաստ է ԱՄՆ-ին սանձազերծելու գործին միանալու, քանի որ ԱՄՆ-ն շարունակում է այն անհեթեթ տեսությունը, որ ինքը պիտի կառավարի աշխարհը և լինի միջազգային ժանդարմ:

Ըստ Հիլարի Քլինթոնի վերջին հայտարարությունների՝ երկրագունդը չի կարող գոյատևել առանց ԱՄՆ-ի կառավարման: Սա խիստ զայրացրել է Չինաստանին: Կան հստակ պլաններ BRICS-ը հզորացնելու, հատկապես վերջին հանդիպման ժամանակ Չինաստանի նախագահի կողմից Ռուսաստանի նախագահին կատարած՝ միացյալ ուժերով ԱՄՆ-ին սանձազերծելու հարցում:

Ըստ բանախոսի՝ Չինաստանը պատրաստ է ԱՄՆ-ի հետ բախվելու օվկիանոսներում, քանի որ ունի հզոր ռազմական նավատորմ և մեծ սպառնալիք է ներկայացնում ԱՄՆ-ի համար տարածաշրջանում:

Հետաքրքրական էր, որ իտալացի հայտնի գործիչները քննարկման ներկայացրին ԵԱՏՄ-ին Չինաստանի միացման միտքը:

Ճիշտ է՝ հնչեց նաև կարծիք, որ ԵՄ-ի այսօրվա ճգնաժամը չմտածված և չհաշվարկած քանակի երկրներ ԵՄ-ի կազմում ներգրավելն էր, և ԵՄ-ին սպասվում է ԽՍՀՄ-ի ճակատագիրը. չի կարելի մշակութային տարբեր արժեհամակարգեր ունեցող երկրները միավորել մեկի տակ: Չին փորձագետին հատկապես զայրացնում է այն միտքը, որ ԱՄՆ-ն ունենալով չնչին պատմական ժառանգություն՝ փորձում է բոլորի վրա տարածել իր անհեթեթ արժեհամակարգը և այն էլ այն դեպքում, երբ ինքն ունի ժողովրդավարության հարցում դեֆիցիտ՝ իր երկրի ներսում:

Նման բացախոսություն նույնիսկ անցյալ տարվա ֆորումին չի գրանցվել: Ամեն ինչ խոսում է այն մասին, որ Սիրիայի պատերազմը կարծես բոլորին ստիպել է վերջնական եզրակացության գալու, որ այսպես շարունակելն այլևս անհնարին է: Չի կարելի թույլ տալ, որ պատմություն և հին մշակութային արժեհամակարգ չունեցող ինչ-որ մի երկիր ստիպի հազարամյա պատմություն ունեցող և տարբեր մշակութային ընկալումներ ունեցող ժողովուրդներին մտածել իր նման, իր ստանդարտներով և կասկածելի չափանիշներով ուղղորդվել:

Ասվածի հիման վրա հատկապես ողբերգական է ընկալվում ԵՄ-ի մուսուլմանացման ապագան: Արքայադուստ Ինգրիդ Դետտեր դե Ֆրանկոպանը կոնկրետ հայտարարեց, որ ԵՄ-ն ոչ թե տնտեսական արժեհամակարգի ներկայացուցիչների ակումբ է, այլ քրիստոնեական մշակութային բարձր արժեքներին հարող երկրների, և դրանք արհամարհելը կբերի ԵՄ-ի արագ անկմանը:

Փաստորեն, այս ֆորումը նշանավորվեց նրանով, որ բացի տնտեսական համագործակցության հետաքրքրական առաջարկներից, հնչեցին արևմտաեվրոպական կարևոր երկրերից մեկում՝ Իտալիայում, ԵՄ-ի քաղաքականությունը խիստ քննադատող ելույթներ և դեպի արևելք հայացքն ուղղելու կոչեր՝ դեպի Ռուսաստան և Չինաստան, դեպի նոր միացյալ ուժերով գեոքաղաքականություն սկսելու կոչեր: