Տեղի ունեցավ Հայաստանի Այկիկենդո կարատեի ֆեդերացիայի 9-րդ բաց առաջնությունը (լուսանկարներ)

Հայաստանի խուլերի միավորման մշակույթի և սպորտի պալատի սպորտդահլիճում տեղի ունեցավ Հայաստանի Այկիկենդո կարատեի ֆեդերացիայի 9-րդ բաց առաջնությունը:

Առաջնությանը մասնակցեց ինչպես Այկիկենդո կարատեի ֆեդերացիայի մոտ 200 մարզիկ, այնպես էլ կոնտակտային բոլոր մարզաձևերի, նաև Վրաստանի ներկայացուցիչներ:

Մրցաշարի բացման արարողությանը ներկա էին արտիստներ, պատգամավորներ, երգիչներ և սպորտային ֆեդերացիաների նախագահներ:

Բացման արարողությունից հետո տեղի ունեցավ պարգևատրման արարողություն, շնորհակալագրեր ստացան Ակիկենդոյի ֆեդերացիային նեցուկ կանգնած անձինք: Հատուկ շնորհակալագրի արժանացավ ֆեդերացիայի փոխնախագահ Կարեն Պապիկյանը: Մի շարք մարզասերների և ֆեդերացիայի աջակիցների հանդիսավորությամբ շնորհվեցին պատվոգրեր, և վերջիններս համալրեցին ֆեդերացիայի շարքերը:

Շնորհակալագրի արժանացավ նաև «Արմենիա ԹիՎԻ» սպորտի մեկնաբան, ֆեդերացիայի լավագույն բարեկամ Էդուարդ Քալանթարյանը:

Ֆեդերացիայի նախագահ Դավիթ Աթանեսյանի խոսքով՝ այսօր ունենք սերունդ, ովքեր պատրաստ են ծառայելու հայրենիքին, պաշտպանելու իրենց հողն ու ընտանիքը. «Գովելի է, երբ տեսնում ենք այսպիսի կամային հատկանիշներով օժտված տղաների, ովքեր մեր ապագան են»:

Իր խոսքում Հայաստանի Այկիկենդոյի ֆեդերացիայի նախագահ, Եվրոպայի կրկնակի չեմպիոն, ԿԱՏԱ ձևից աշխարհի չեմպիոն, սև գոտի 5-րդ դան Դավիթ Աթանեսյանը նշեց, որ մրցաշարը նվիրվում է Էրեբունի-Երևան 2798 ամյակին: