Սարկիսովն իմ տակտիկական մոդելին չի համապատասխանում. Վարուժան Սուքիասյան

Հոկտեմբերի 11-ին կայացած 2018թ. Աշխարհի գավաթի խաղարկության Լեհաստան-Հայաստան խաղից հետո, «Ազգային» մարզադաշտի մամուլի ասուլիսների սրահում տեղի ունեցավ Հայաստանի ազգային հավաքականի գլխավոր մարզիչ Վարուժան Սուքիասյանի հետխաղային մամուլի ասուլիսը: Այդ մասին տեղեկացնում է ՀՖՖ պաշտոնական կայքը:

-Ռումինիայի խաղից հետո թիմը կարծես վերածնված լիներ: Ինչի՞ հաշվին հաջողվեց վերականգնել թիմի խաղը:

-Բոլոր թիմերն էլ ունենում են վատ և լավ խաղեր: Այս տարվա անհաջողությունների շղթան մեզ շատ անհանգստացնում է: Գիտեք, որ հիմնական կազմի 7 ֆուտբոլիստ վնասվածքներ ունեն և տղաները իրենց մեջ ուժ գտան ծանր պարտությունից հետո հավաքվել:

Մրցավարությունից կոռեկտ չէ խոսել, բայց ուզում եմ ասել ձեզ, նկատե՞լ եք, թե որ րոպեին գոլ խփեցին: Երկրորդը, որպես կանոն, եվրոպական մրցաշարերում մրցավարը սկզբից բանավոր զգուշացնում է, այնուհետև դեղին քարտ ցույց տալիս: Ամեն դեպքում շնորհավորում եմ Լեհաստանի հավաքականին, շնորհակալություն եմ հայտնում տղաներին, այսօր տակտիկապես շատ գրագետ խաղացին, և կարծում եմ, որ, եթե Օզբիլիսը երկու անգամ մնալով դարպասապահի առջև մեն-մենակ, գոնե մեկ գոլ խփեր, ապա մենք կհաղթեինք:

-Կարմիր քարտը կարծես թե ոչինչ չփոխեց խաղի ընթացքում: Ի՞նչ ասեցիք տղաներին, որ ավելի հաջող սկսեցին խաղալ:

-Ես տղաներին ասեցի, որ նույն մոդելով է պետք խաղալ, որովհետև, ինչպես տեսաք, մենք Մարկոսին հետ քաշեցինք և կարողացանք փակել հենակետայինի դիրքը: Տարոն Ոսկանյանը ճիշտ կատարեց Գաել Անդոնյանի պարտավորությունները: Ճիշտ է, հակառակորդը լավ պահեր ունեցավ, բայց ամեն դեպքում, նամանավանդ այսօր, խաղալով 10 հոգով, մենք արժանի չէինք պարտության:

-Երկրորդ խաղն անընդմեջ Գաել Անդոնյանը անթույլատրելի սխալներ է անում: Ինչպե՞ս դա կմեկնաբանեք:

-Խաղը պետք է կրկին նայել, ամեն դեպքում ժամանակ է պետք, որ քննարկենք դա:

-Երբ չհրավիրեցիք Կորյանին, Արշակյանին և Սարկիսովին, Ձեզ շատ քննադատեցին: Հաշվի առնելով այսօրվա հանդիպման ընթացքում ունեցած պահերը, չե՞ք կարծում, որ իրենց ներկայության դեպքում հաշիվը այլ կլիներ:

-Կորյանը հայտացուցակում էր: Այնպես ստացվեց, որ չէինք կարող հարձակվող օգտագործել և հույսը դրել էինք մեր եզրային կիսապաշտպանների վրա, որոնք պետք է իրացնեին հակագրոհները: Այդպես էլ եղավ, բայց արդյունքի չհասանք: Արշակյանը չարդարացրեց սպասելիքները, իսկ Սարկիսովը իմ տակտիկական մոդելին չի համապատասխանում:

-Ի՞նչ կասեք Ռոբերտ Լևանդովսկու խաղի մասին: Դանիայի դեմ նա երեք գոլ խփեց…

-Ինձ թվում է, որ ցանկացած մարզիչ կասի, որ Լևանդովսկին բարձրակարգ հարձակվող է և ցանկացած հավաքական կուզենար ունենալ նման հարձակվող: Բացի վերջին գոլի դրվագից, կարող եմ ասեմ, որ մեր պաշտպաններին հաջողվեց չեզոքացնել նրան:

-Անցկացված խաղերից ո՞րն էր Ձեր համար ամենադժվարը:

– Երեք էլ դժվար էին, բայց վերջին երկուսը առանձնապես, քանի որ խաղում էինք 10 հոգով: Ինձ թվում է՝ որոշակի ժամանակ հետո մեզ կհաջողվի ավելի լավ խաղալ:

-Ես հիշում եմ այն ժամանակները, երբ Հայաստանի հավաքականը Կոպենհագենում հաղթում էր 4:0 հաշվով: Ինչպե՞ս եք հիմա գնահատում հավաքականի վիճակը և Ձեր կարծիքը խմբում տիրող իրավիճակի մասին:

-Իրավիճակը խմբում լարված է լինելու, այսօր Չեռնոգորիան կրկին միավորներ վաստակեց: Երբ մեր առաջատարները վերադառնան, մեզ հետ էլ դժվար կլինի խաղալ: Ինչ վերաբերվում է նախկինում ունեցած հաջողություներին, ապա այն ժամանակ լավ կազմ ունեինք, բոլոր տղաները պատրաստ էին: Հիմա որոշ ֆուտբոլիստներ խաղային պրակտիկա չունեն իրենց թիմերում, ամեն դեպքում աշխատում ենք, որ հետագայում լավ հավաքական ունենանք: