Կառավարություն գազ է լցվում

Կառավարության ղեկավարի փոփոխությունից հետո մտավախություն կար, որ «Գազպրոմ-Արմենիայի» նախկին ղեկավարը կառավարությունը «գազի» գրասենյակի կվերածի: Երևի թե դրա մեջ ոչ մի վատ բան չկա: Կառավարությունում կսկսեն աշխատել քիչ թե շատ պրոֆեսիոնալներ: Ինչպես միշտ, սակայն, երկու երանի մեկ տեղում չի լինում:

Հիշեցնենք, որ «Գազպրոմ Արմենիան» է կրկնակի գնով գազ վաճառում բնակչությանը, գազի հաշվիչներից համատարած դժգոհ են, գազ օգտագործելու համար ողջ պրոցեդուրան` նախագծումից մինչև իրականացում, մեծ գլխացավանք է: Դրանից հետո սպասարկման անհասկանալի գումարները, որը չգիտես թե ինչի համար է վճարվում, յուրաքանչյուր կետի համար գումարը:

Կարճ ասած՝ ոչ թե գազի գրասենյակ, այլ իսկական միգրեն:

«Գազպրոմ-Արմենիայի» խոսնակի վերաբերյալ ոչ ոք կասկած չուներ, որ Շուշան Սարդարյանը կլինի կառավարությունում, այնուհետ «Էյ-Ի-Ջի Սերվիս» ՍՊԸ-ի գլխավոր տնօրեն Արսեն Հարությունյանը տեղափոխվեց Ջրային տնտեսության պետական կոմիտե:

«Էյ-Ի-Ջի Սերվիս»-ն իրականացնում է գազի սպասարկումը: Եթե ազգաբնակչությանը հարցնեն, թե գո՞հ են գազի սպասարկումից (լավ է, որ չեն էլ հարցնում) հաստատ կհիշեն անգամ նախնիների գործած ու չգործած մեղքերը:

Կարճ ասած՝ «Գազպրոմ-Արմենիան» այս տարիներին կողոպտել ու թալանել է բնակչությանը, իսկ շատ մեծահարուստներ և նրանց գործարաններն անգամ չեն վճարում գազի դիմաց:

Այժմ պատկերացնենք, որ նման մտածելակերպով մարդկանց խումբը տեղափոխվում է կառավարական համակարգ: Եթե առաջ գազի մարդն էր, հիմա հարկայինի մարդը կլինի, ջրի մարդը, «եսիմինչի» մարդը:

Վերջին ակորդը եղավ այն, որ «Գազպրոմ-Արմենիա» ընկերության գլխավոր տնօրենի պաշտոնը Վարդան Հարությունյանը թողեց և դարձավ ՊԵԿ նախագահ: Այժմ թալանը լինելու է կուլտուրական և բարձր մակարդակի վրա, ոչ թե պպզած կամ գողականով:

Կուլտուրական թալանվելու ենք:

Կարեն Կարապետյանը որոշել է կառավարությունում բաց թողնել գազի խողովակը, բայց կառավարականները դժվար թունավորվեն, քանի որ, ինչպես ժողովուրդն է ասում, գազին «օդ» են խառնում, գազի մարդիկ սովոր են:

NEWSPRESS.am