Վոլոդյա Ավետիսյանը նամակ է գրել Կարեն Կարապետյանին

«Վարդաշեն» ՔԿՀ-ում  6,5 տարվա ազատազրկման դատապարտված ազատամարտիկ Վոլոդյա Ավետիսյանը բաց նամակ է հղել ՀՀ վարչապետ Կարեն Կարապետյանին և նրա ուշադրությունը հրավիրել այն փաստին, որ Հայաստանում ՀՀ քրեական օրենսգրքի 76-րդ հոդվածը՝  Պատիժը կրելուց պայմանական վաղաժամկետ ազատելը,  անտեսվում է այն կիրառողների կողմից: Նա խնդրել է վարչապետին վերահսկողության սահմանել այս խնդր վրա:

«Մեծարգո պարոն Կ. Կարապետյան, նախևառաջ, շնորհավորում ենք Ձեզ ՀՀ վարչապետի բարձր և պատասխանատու պաշտոնը ստանձնելու առթիվ և մաղթում հաջողություններ Ձեր սկսած ազգանվեր գործունեության մեջ:

Հարգելի պարոն վարչապետ, մենք՝ դատապարտյալներս, քաջ գիտակցում ենք, որ մեր երկրի առջև ծառացած բազմաթիվ ծանր մարտահրավերներին դիմակայելը և դրանք ի շահ ազգի օգտագործելու գործընթացը շատ դժվար է լինելու և մեծ ջանքեր ու ժամանակ է պահանջելու: Սակայն խնդրում ենք մի պահ ժամանակ գտնել և անդրադառնալ Հայաստանի դատաիրավական համակարգում տեղ գտած մի արատավոր երևույթի: ՀՀ քրեական օրենսգրքի 76-րդ հոդվածը անտեսվում է այն կիրառողների կողմից: Կարծես թե այդ հոդվածը ընդհանրապես գոյություն չունի: Հարցը տարիներ շարունակ բարձրացվել է թե հանրության, թե հազարավոր դատապարտյալների կողմից: Սակայն պատասխանն այդպես էլ չի տրվում: Տարիներ շարունակ արդարադատության ամեն մի նախարար խոստանում է այդ հարցին շուտափույթ լուծում տալ: Սակայն ինչ-որ բան խանգարում է (ինչպես կոռուպցիան):

Հարգելի պարոն վարչապետ, մեկ անգամ ևս խնդրում ենք Ձեր անձնական վերահսկողությամբ հանձնարարել պետական մարմիններին հնարավորինս հարգել և կատարել գործող օրենքը, որը, մեր խորին համոզմամբ, բոլորի նկատմամբ պետք է լինի հավասար: Այսօրվա իշխանությունները մեր ժողովրդի և պետության թշնամիներն են»,- նամակում գրել է Ավետիսյանը: