Մարդ ցնցվում է, երբ կարդում է հալեպցի աշակերտուհի Մերի Սերչեյանի տագնապով լի տողերը

Հրապարակախոս Զարուհի Հովհաննիսյանը ֆեյսբուքյան իր էջում գրել է.

«Ուղղակի մարդ ցնցվում է, երբ կարդում է 10-րդ դասարանի աշակերտուհի Մերի Սերչեյանի տագնապով լի այս տողերը՝
«Ոչ մի ճամբա չգիտենք, չգիտենք՝ ինչպես դուրս գալ այստեղից: Մենք Թելեֆօն Հաուայի շրջանում ենք բնակվում, ուր վատ է իրավիճակը»,- գրում է աշակերտուհին, որը նշում է`թերևս Լաթաքիայի ճանապարհով հնարավոր լինի Հայաստան հասնել, որի համար ընտանիքը չունի միջոցներ:

«Մենք ուզում ենք հեռանալ այս պատերազմի դաշտից, օգնեք մեզ»,- գրում է Կրթասիրաց վարժարանի աշակերտուհին, որի հաճախած դպրոցը մեկ շաբաթից ավելի է փակ է:

Հիմա բացում եմ ՀՀ սփյուռքի նախարարության «Հայերն այսօր» պարբերականն ու կարդում թարմ հարցազրույց Սիրիայի Արաբական Հանրապետության խորհրդարանի պատգամավոր, Սիրիայի հայ համայնքի ներկայացուցիչ Ժիրայր Ռեիսյանի հետ:

Հարցին, թե արդյոք կա՞ն մարդիկ, որ ուզում են գալ Հայաստան, Ռեիսյանը պատասխանում է, թե նման բան չկա, որ մարդիկ այստեղից ցանկանան Հայաստան գալ և չկարողանան: «Կարող են պահեր լինել, որ հրթիռակոծումներ լինեն, կարող են վնասներ և զոհեր լինեն, սակայն խուճապային իրավիճակ, որ մարդիկ դիմեն Հայաստան գալու համար, չկա»:

Դրան էլ հավելում է. «Անհանգստության հարց չկա, բայց խնդրում եմ՝ այստեղ-այնտեղից լսված խոսքերին չհավատալ, այլ միայն պաշտոնական աղբյուրներից տեղեկանալ»:

Գլխներիս ՊՆ խոսնակ է դարձել՝ ապրիլյան պատերազմի ժամանակ, երբ բոլորին արգելում էին ցանկացած աղբյուրից տեղեկատվություն ստանալ, բացի պաշտոնական աղբյուրից:

Հիմա հարց է ծագում, եթե կան ռմբահարումներ, մարդկային զոհեր, պարզ չէ՞, որ դպրոցահասակ երեխան իր ընտանիքով կցանկանա տեղափոխվել առավել ապահով մի տեղ, մի երկիր, որն իրեն հռչակել է համայն հայության հայրենիք, սակայն հիմա գլուխն ավազի մեջ մտցրած անընդհատ ասում է, թե հայերը չեն ցանկանում գալ: Է առաջարկեք, տարհանեք, բերեք, թե անպայման էս երկրից պիտի գնան, ոչ թե գան, թե պիտի էս տարածքում գլուխցավանք չստեղծեն, օլիգարխների անդորրը չխաթարեն իրենց խնդիրներով: Ես չեմ հասկանում, սա ինչ տմարդի քաղաքականություն է: Անցած տարի էլ միաբերան ասում էին Բեյրութը մեր ռազմավարական գաղթօջախն է, այդտեղից հայերը չպիտի գնան: Հա, թող մեռնեն, բայց չգնան: Իսկ Հայաստանը լքողների մասով ռազմավարություն չունե՞ք, որ չթողնեն գնան, թե դա ձեռնտու է, գնան, որ հեղափոխություն չանեն:

Դուք անտանելի եք…»: