Գնային քաղաքականությունը հիմնականում իրականացնում են ավիափոխադրողները. ՀՀ ՊՆ

ՀՀ ՊՆ-ն պարզաբանում է ներկայացրել «Հայկական Ժամանակ» օրաթերթի հոկտեմբերի 1-ի համարում ՀՀ ՊՆ-ի կողմից ձեռք բերված ավիատոմսերի գների վերաբերյալ հրապարակման կապակցությամբ: Պարզաբանման մեջ նշվումէ հետեւյալը.

Հրապարակման մեջ նշված ավիատոմսերի ձեռքբերման գործընթացը իրականացվել է «Գնումների մասին» ՀՀ օրենքով հաստատված ընթացակարգերի շրջանակներում: Ավիատոմսերի ձեռքբերման վերաբերյալ բաց հրավերը հրապարակվել է համապատասխան էլէկտրոնային կայքերում, ինչպես նաև ուղարկվել է 16 գործակալությունների (օրենքով սահմանված է նվազագույնը երեք գործակալություն): Մրցույթն իրականացվել է թռիչքից 2 շաբաթ առաջ և մրցույթի ուշ հայտարարաման ժամանակային գործոնը էական ազդեցություն չէր կարող ունենալ արժեքի վրա:

Ավիատոմսերը հանդիսանում են շուկայում այնպիսի ապրանք, որոնց գները փոփոխական են` աճում կամ նվազում են յուրաքանչյուր օր և յուրաքանչյուր ժամ, իսկ կոնկրետ ավիատոմսի գինը ձևավորվում է այն պահին, երբ այն ձևակերպվում և դուրս է գրվում կոնկրետ մարդու տվյալներով: Յուրաքանչյուր պնդում կոնկրետ օրերին ավիատոմսերի արժեքի վերաբերյալ միայն կանխատեսումներ և գուշակություններ են:

Գնային քաղաքականությունը հիմնականում իրականացնում են ավիափոխադրողները, որոնց մեծագույն մասը հանդիսանում են Հայաստանում ոչ-ռեզիդենտ: Մրցույթներին մասնակցող ավիագործակալությունները հանդիսանում են միջնորդներ և ունենում են որոշակի շահույթ, որը չի կարող մեծ լինել մրցակցության պայմաններում, քանի որ ՀՀ ՊՆ կողմից իրականացվող միցույթը բաց է և դրան մասնակցում են մի շարք գործակալություններ:

Պաշտպանության նախարարությունում ավիատոմսերի ձեռք բերման մրցույթի համար անհրաժեշտ տեխնիկական բնութագրերը ձևավորվում են ոչ թե կոնկրետ չվերթով, այլ գործուղման պայմաններից ելնելով` ժամանման և մեկնման վայր, ժամանման և վերադարձի ժամանակային միջակայք, անհրաժեշտ տեխնիկական պայմաններ, ուղեբեռի առկայություն կամ դրա բացակայություն, տարանցիկ չվերթներ, մուտքի և ելքի արտոնագրերի առկայություն և այլ տեխնիկական պայմանների նշումով, ինչը, օգտագործելով որպես ելակետային տեղեկություն, մրցույթին մասնակցող ավիագործակալությունները երկայացնում են հնարավոր երթուղիները:

Չի կարող ձեռք բերվել առաջնակարգ (բիզնես) դասի ավիատոմսեր, բայց փաստաթղթերում ձևակերպել այլ բան, քանի որ տոմսերի ձեռքբերման գործընթացը` սկսած հայտի/տեխնիկական բնութագրի ձևավորումից, վերջացրած ինքնաթիռում նստեցման կտրոնով, ամբողջովին փաստաթղթավորվում է թե թղթային, թե էլեկտրոնային տարբերակներով և, անհրաժեշտություն դեպքում, կարող է ստուգվել համապատասխան մարմինների կողմից: Բացի այդ, գնման գործընթացին մասնակցող ավիաընկերությունների մեկից ավել լինելու հանգամանքը, ինչպես նաև գործընթացը իրականացնող հանձնաժողովի բազմանդամությունը զրոյացնում է պայմանավորվածություններ ձեռք բերելու հնարավորությունները:

Մրցույթի արդյունքները գնահատվում են գնահատող հանձնաժողովի 7 անդամների կողմից` ներկայացված գների, օրենքով նախատեսված և թույլատրելի ստուգումներ իրականացնելուց հետո (էլեկտրոնային հարթակներում մրցույթի արդյունքների բացման պահին ներկայացվող ավիատոմսերի առկայությունը, դրանց ընթացիկ գները): Ըստ ընթացակարգի` եթե էլէկտրոնային հարթակներում, որտեղից օրենքով սահմանված թույլատրելի մեխանիզմներով հնարավոր է ձեռք բերել ավիատոմս, առկա է ավելի էժանը, ապա մրցույթի արդյունքները չեղյալ են համարվում և ձեռք է բերվում առկա ավելի էժան տոմսը, կամ, դրա անհնարինության պարագայում, վերահայտարարվում է նոր մրցույթ: Կոնկրետ երթուղով ավիատոմսեր մրցույթի են դրվում միայն խիստ անհրաժեշտության դեպքում, և, եթե առկա է նշյալ գործուղվողին նախանշված երթուղով գործուղելու անհրաժեշտություն` ելնելով ծառայողական անհրաժեշտությունից: Այնպես որ, ավիաընկերությունների ընտրությունը չի իրականցվում ՀՀ պաշտպանության նախարարության կողմից, օր.` վերոնշյալ հոդվածում նշված Երևան-Լոնդոն-Երևան չվերթը իրականացվել է Երևան-Մոսկվա-Լոնդոն-Մոսկվա-Երևան ուղղությամբ: Իսկ Երևան-Վիլնյուս-Երևան չվերթն իրականցվել է Երևան-Վարշավա-Վիլնյուս-Վարշավա-Երևան ուղղությամբ («Լեհական ավիաուղիները» չի համարվում եվրոպական թանկարժեք ավիաընկերություն):