Դու ինձնից լա՞վ տղա ես. բղավոցներ, աթոռակռիվ ու միջադեպ՝ Գյումրիում քվեաթերթիկները հաշվելու ժամանակ (տեսանյութ)

Գյումրիի թիվ 34/29 ընտրատեղամասում քվեատուփը բացելու և քվեաթերթիկները հաշվել սկսելու գործընթացը բավականին թեժ էր:

Հանձնաժողովի անդամներն ու վստահված անձինք բառի բուն իմաստով աթոռակռիվ էին տալիս՝ ով որտեղ պետք է նստի և արդյոք պետք է նստի՞, թե՞ կանգնի:

ԳԱԼԱ կուսակցության վստահված անձն առաջարկում էր, որպեսզի վստահված անձինք և հանձնաժովողի անդամները մեկումեջ նստեն: Վերջինս և հանձնաժողովի նախագահը միմյանց խորհուրդ էին տալիս բացել օրենսգիրքն ու կարդալ՝ միաժամանակ միմյանց առաջ դնելով Ընտրական օրենսգիրքը:

«Բալասանյան դաշինքի» վստահված անձն էլ իր հերթին, ի պատասխան հանձնաժողովի անդամների, թե վստահված անձինք  չպետք է նստեն սեղանի շուրջ՝ պնդում էր, որ ինքը հոգնած է ու «պդի նստի»: Դա առաջացրեց մեկ այլ վստահված անձի բարկությունը, ով բղավեց՝ «դու տղամարդ ես, ես էլ կնիկմարդ եմ, ամբողջ օրը ներվերներս կերար»: «Լավ եմ էրե»,- պատասխանեց ավագանու անդամ-վստահված անձը:

Նշենք, որ այս տեղամասում ընտրության իրավունք ուներ 1574 ընտրող, որոնց քվեարկությանը մասնակցել էր 639-ը: 290 ձայնով «Բալասանյան դաշինքն» առաջատարն էր: Մնացած ձայները բաշխվել էին հետևյալ կերպ՝

«Ալյանս»- 12,

«Բալասանյան դաշինքի»- 290,

ԲՀԿ – 92,

«ԳԱԼԱ» – 47,

«Գյումրեցու ոգու» – 56

«Գործարար կուսակցության» 3 ,

«Համախմբում» – 17,

ՀԱԿ – 8 ընտրող,

ՀՅԴ- 27,

«Հայկական վերածնունդ»- 39,

«Քաղաքացիական պայմանագիր» – 10,

Անվավեր – 38: