Իմ ընտրվելու շանսերը գնահատելու է ժողովուրդը. Սամվել Բալասանյանն արեց ընտրությունը

Գյումրու թիվ 34/74 ընտրատեղամասում իր ընտրությունը կատարեց նաև 2012թվականից մինչ օրս Գյումրիի քաղաքապետի պաշտոնը զբաղեցնող, «Բալասանյան» դաշինքի ղեկավար Սամվել Բալասանյանը։

Թոռնուհու հետ ընտրության եկած քաղաքապետի թեկնածուն լրագրողների հետ զրույցում ասաց, որ քվեարկել է հանուն նրա ապագայի:

Դիտարկմանը, թե ընտրություններն ընթանում են ընտրախախտումներով, Արցախի և այլ թաղամասերում մարդկանց են տանում ընտրության, Սամվել Բալասանյանն ասաց, որ այդ մասին թող անմիջապես հայտնեն իրավապահ մարմիններին.

«Դա քրեորեն պատժելի է։ Ես որևէ խնդիր չունեմ, որ մենք ընտրախախտում անենք։ Այսօր էլ բոլոր տասը կուսակցություններին հորդորել եմ որևէ խախտում չկատարել և լինի արդար, ազատ, թափանցիկ ընտրություններ»։

Հարցին, թե որքան է գնահատում իր ընտրվելու հնարավորությունը, Բալասանյանն ասաց, որ շանսերը գնահատելու է ժողովուրդը՝ իր կատարած աշխատանքով։ Ընտրողների ընտրությանը մասնակցության վերաբերյալ հարցին, Բալասանյանն ասաց, որ նվազ ակտիվություն է նկատվում.

«Ժամը 11։00-ի դրությամբ 7554 ընտրող է մասնակցել, տեսնենք՝ ինչ կլինի կեսօրից հետո»։

«Հայկական վերածնունդ» կուսակցության ղեկավար Հովհաննես Մարգարյանի վերաբերյալ տեսանյութի տարածման և Բալասանյանին ուղղված պատասխանի վերաբերյալ Գյումրու գործող քաղաքապետն ասաց. «Եթե նման հարց կա, որ համապատասխան մարմինները պետք է զբաղվեն, թող զբաղվեն»։