«Հաղթանակս նվիրում եմ հայրիկիս հիշատակին». հայ երգչուհին Բուլղարիայից վերադարձել է ոսկե մեդալով (լուսանկար)

Սեպտեմբերի 15-19-ը Բուլղարիայի Սոֆիա քաղաքում կայացած «Գրան Պրի 2016» (SOFIA GRAND PRIX-2015) միջազգային մրցույթին Հայաստանն ունեցավ ոչ միայն իր մասնակիցները, այլև ոսկե մեդալակիրները:

Տարբեր տարիքային խմբերում և անվանակարգերում անցկացվող ամենամյա մրցույթին մինչև 18 տարեկան տարիքային խմբի դասական երգեցողություն անվանակարգում Հայաստանը ներկայացրել է գառնեցի Նավասարդ Հակոբյանը, իսկ 18-ից բարձր տարիքային խմբի էստրադային ժանրում` վանաձորցի Տաթևիկ Գալստյանը: Վերջիններս առաջին անգամ էին մասնակցում նման մեծամասշտաբ միջազգային մրցույթի:

Հայաստանի ներկայացուցիչներին արտերկրում ներկայացրել է «Կատարողական արվեստի համաշխարհային ասոցիացիա»-ի (WAPA) փոխնախագահ Վիգեն Թանաշեանը, ով այս տարի ընդգրկված էր նաև ժյուրիի կազմում:

Այս տարի մրցույթին մասնակցել է 10 երկրի 63 մասնակից: Վերջիններս ներկայացել են դասական երգեցողություն, նոր երգ, պոպ, ժողովրդական երգեցողություն անվանակարգերում:

Հայաստանը ներկայացնող Տաթև Գալստյանն ու Նավասարդ Հակոբյանն իրենց ժանրերում գրավեցին առաջին տեղն ու վերադարձան ոսկե մեդալներով:

Բացի դրանից, Նավասարդ Հակոբյանը «հանդիսատեսի համակրանք» անվանակարգում արժանացավ մրցանակի, իսկ Տաթևիկ Գալստյանը ժյուրիի կողմից արժանացավ հատուկ մրցանակի` «Мед» անվանակարգում:

Հատկանշական է նաև, որ մեր հայրենկիցներն ընդգրկվել են լավագույն յոթնյակում և մասնակցել Գալա մրցանակաբաշխությանը: Նրանք վերադարձել են մեծ տպավորություններով:

Տաթև Գալստյանը, ով նաև պարուսույց է և բազմաթիվ մրցույթների դափնեկիր ու միջազգային առաջին կարգի մրցավար, NEWSPRESS.am-ի հետ զրույցում նկատեց, որ մեծ պատիվ էր հայտնվել լավագույն յոթնյակում, այն դեպքում, երբ ընդհանուր մասնակիցների թիվը հասնում էր 63-ի:

Նկատենք, որ որպես մրցույթին մասնակցելու պարտադիր պայման՝ յուրաքանչյուր մասնակից ներկայացել է երկու կատարմամբ. երգչի հայրենի երկրի կոմպոզիտորի ստեղծագործությամբ և օտար լեզվով: Տաթև Գալստյանը կատարել է «Նուբար, նուբար» երգը` վանաձորցի կոմպոզիտոր Աիդա Ավետիսյանի մշակմամբ: Իսկ օտար լեզվով կատարողականում հանդես է եկել «Թբիլիսո» վրացերեն երգով: Երկու երգերի երաժշտական ձևավորումն էլ հեղինակել է Արթուր Ղազարյանը:

«Ծնվել եմ արվեստագետների ընտանիքում ու հաղթանակիս համար շնորհակալ եմ հատկապես իմ ընտանիքին: Ես իմ հաղթանակը նվիրում եմ հայրիկիս հիշատակին: Ինձ համար դժվար պայքար էր, քանի որ առաջին անգամ էի գտնվում երգի միջազգային մրցույթում, բայց ամեն ինչ հաջողվեց…»,- ասաց Տաթև Գալստյանը:

Ըստ նրա` մրցույթը թերևս առանձնահատուկ էր նրանով, որ ժյուրիի անդամները մասնակիցների հետ շփվում էին ոչ միայն բեմից, այլ փորձում են ծանոթանալ նրանցից յուրաքանչյուրի հետ` անհատապես:

Հիշեցնենք, որ 2015-ին Հայաստանը ներկայացրել է գյումրեցի Լեոնորան, ում իրական անունն Արևիկ է: Դասական երգչուհի Լեոնորան արժանացել է «Sօfia Grand Pri-2015-» մրցանակին: Նա բեյրութահայ պրոդյուսեր Վիգեն Թանաշեանի կինն է: