Փոքրիկ Հայաստան՝ Ֆրանսիայում. բարեգործական ծրագիր՝ հանուն առողջական խնդիրներ ունեցող երեխաների (ֆոտոշարք)

Ֆրանսիայի Ռեն քաղաքում սեպտեմբերի 20-ը բացառիկ օր էր: Հայաշատ այդ քաղաքում ավելի քան 2 ժամ հայկական շունչն էր, երգն ու երաժշտությունն էր: Ավելի քան 6 ամիս ֆրանսիական Bonheure Retrouve կազմակերպությունը և NEWSPRESS.am լրատվական կայքը համատեղ աշխատեցին բարեգործական մի նախագծի շուրջ, որը պիտի սատարի Հայաստանում առողջական խնդիրներ ունեցող երեխաներին:

Ռենն առաջին քաղաքն էր, ուր բարեգործական այս նախաձեռնությունը միս ու արյուն ստացավ: Մեծ էր թե′ ոգևորությունը, թե′ բարի կամք դրսևորելու ցանկությունը:

Հայաստանից Ռեն ժամանած ժողովրդական ու էստրադային երգիչներն ու հանդիսատեսը քաղաքի Ասոցացիների տան դահլիճը վերածել էին Հայաստանի մի փոքրիկ անկյան: Բեմահարթակը դղրդում էր հայկական երգի հնչյուններից ու Ռենում ապրող հայ փոքրիկների պարի ռիթմից:

Մեծ էր ռենահայերի պատրաստակամությունը ոչ միայն համերգային ծրագրին մասնակցելու, այլև հանգանակություն կատարելու առումով։ Ռենում ապրող երիտասարդ հայ գործարար Վիգեն Մինասյանի համար Հայաստանում ապրող յուրաքանչյուր երեխայի կողքին կանգնելը խղճի ու հոգու թելադրանք է, և հենց այդ պատճառով լուրջ հանգանակությունից բացի, Վիգեն Մինասյանը պատրաստակամություն հայտնեց այլ հարցերով ևս սատարելու Հայաստանում կարիքավոր ընտանիքներին:

Ռենահայ մեկ այլ գործարար Մուշեղ Հովհաննիսյանն անձնական միջոցներից հոգացել էր ոչ միայն համերգի դահլիճի ծախսերը, այլև լուրջ հանգանակություն կատարել՝ փաստելով, որ Հայաստանն աշխարհի յուրաքանչյուր անկյունում ապրող հայինն է, և այսօրվա առողջ հայ փոքրիկն է կերտելու վաղվա լուսավոր Հայաստանը:

14423651_1709557429369803_30392976_o