Դաշնակցությունը խրախճանք է կազմակերպել. ձեռնո՞ց վարչապետին

Էկոնոմիկայի նախարարի պաշտոնակատար Արծվիկ Մինասյանը, Տարածքային կառավարման նախարարի պաշտոնակատար Դավիթ Լոքյանն (ով ավելի ուշ հեռացել է) ԱԺ ՀՅԴ խմբակցության քարտուղար Աղվան Վարդանյանի և ՀՅԴ բյուրոյի ներկայացուցիչ Հրանտ Մարգարյանի հետ այս պահին հավաքված են Երևանի կենտրոնում գտնվող «Շոկոլադնիցա» սրճարանում: Այդ մասին փոխանցում է NEWSPRESS.am-ի աղբյուրը՝ հավելելով, որ դաշնակցականների պահվածքը փոքր-ինչ տարօրինակ է:

Ճոխ սեղանի շուրջ, հավանաբար կանխատեսելով մոտալուտ պաշտոնանկությունը՝ նախարարի պաշտոնակատար, դաշնակցական Արծվիկ Մինասյանը փոքրիկ խրախճանք է կազմակերպել. նա հավաքվածներին տուփով սիգար է բաժանել և իսկական «տոնի» վերածել հավաքը: Կամ միգուցե ընդհակառա՞կը՝ Մինասյանը վստահ է, որ վերանշանակվելու է և այդպիսով ի լուր երևանցիների տեղեկացնում է՝ «ղալաթ կանեն», թե չեն վերանշանակի:

Հիշեցնենք, որ այսօր «Հայկական ժամանակ» օրաթերթը գրել էր, որ նորանշանակ վարչապետ Կարեն Կարապետյանը չի ցանկանում աշխատել Արծվիկ Մինասյանի հետ՝ վերջինիս կողմից տարիներ առաջ արված հայտարարության պատճառով, թե Կարապետյանը լավ քաղաքական գործիչ չէ. «Եվ հիմա ՀՅԴ-ն ոչ այնքան Արծվիկ Մինասյանի, որքան իր կուսակցական թասիբի համար փորձում է ատամներով պաշտպանել նրան ու իր բոլոր նախարարներին»,- այսօրվա իր համարում գրել էր թերթը:

Գուցե հենց ա՞յս պատճառով է Դաշնակցությունը ժողով անում:

Վարչապետի և Մինասյանի միջև միջադեպ տեղի էր ունեցել նաև կառավարության վերջին նիստի ժամանակ, երբ վարչապետն, ըստ էության, մեղադրել էր Մինասյանին ստելու մեջ:

Գուցե Դաշնակցությունը ձեռնո՞ց է նետում վարչապետին…

Թե ինչո՞ւ են հատկապես այսօր ժողով անում դաշնակցականները, թերևս միայն ենթադրել կարելի է. նախ այսօր պաշտոնանկ արվեցին նախկին կառավարության այնպիսի առանցքային նախարարներ, ինչպիսիք Գագիկ Բեգլարյանն ու Գագիկ Խաչատրյանն են, և հետո ևս մեկ առիթ էլ կա՝ Հրանտ Մարգարյանն այսօր պարգևատրվել է  Նախագահի կողմից, հետո ի՞նչ, թե դեռ ավտոմեքենայի մեջ է հանել կրծքանշանը: Գուցե պարզապես դա՞ են նշում:

Ամեն դեպքում՝ ընկեր ջան, գինի՛ լից:

NEWSPRESS.am