Վերանայել գազի և Էլէներգիայի սակագինը, հարկային ստուգումներ անել ռիսկային ձեռնարկություններում. վարչապետի հանձնարարականները

Նորանշանակ վարչապետ Կարեն Կարապետյանն այսօր անցկացրեց կառավարության՝ իր առաջին նիստը: Վարչապետը հանդես եկավ երկու հայտարարությամբ, որոնք վերաբերում էին հարկային և սոցիալական ոլորտներին:

Կարեն Կարապետյանը հանձնարարականներ տվեց Պետական եկամուտների կոմիտեին, Էներգետիկայի և բնական պաշարների, Աշխատանքի և սոցիալական հարցերի նախարարներին և Հանրային ծառայությունները կարգավորող հանձնաժողովին:

Վարչապետը ՊԵԿ ղեկավար Հովիկ Հովսեփյանին հանձնարարեց հարկային ստուգումներ իրականացնելիս մանր և փոքր ձեռնարկություններին անդրադառնալ ծայրահեղ դեպքում. «Ապահովել ոչ կարգապահ և արտոնյալ համարվող խոշոր արտադրողների և ներմուծողների կողմից հարկադիր կարգապահության անվերապահ կատարումը: Երկրորդ՝ հարկային ստուգումները պետք է կատարվեն բացառապես ռիսկային համարվող սուբյեկտներում: Փոքր ու միջին բիզնեսի ձեռնարկությունները պետք է հնարավորինս ազատվեն ստուգումներից, այնտեղ տեսչական ստուգումները պետք է ծայրահեղ միջոց լինեն։ Ստուգումները չպետք է լրացուցիչ անհարմարություններ պատճառեն բիզնեսին: Ապահովել մաքսային ծառայողների հնարավոր սուբյեկտիվ վարքագծի բացառումը և գործողության թափանցիկությունը»:

Վարչապետի մեկ այլ հանձնարարական էլ ուղղված էր ՀԾԿՀ-ին, Աշխատանքի և սոցիալական հարցերի նախարարին և Էներգետիկայի և բնական պաշարների նախարարին՝ վերանայել գազի և էլեկտրաէներգիայի սակագնային քաղաքականությունը.

«Առաջարկում եմ ՀԾԿՀ-ին, Էներգետիկայի և բնական պաշարների, Աշխատանքի և սոցիալական հարցերի նախարարներին համատեղ քննարկել և առաջարկություններ ներկայացնել գազի և էլեկտրաէներգիայի սակագնային քաղաքականության վերանայման մասին»:

Խոսքը վերաբերում է սոցիալապես անապահով խավերին՝ մաքսիմում նվազեցնել սակագինը այլ սպառողների հաշվին: