ԱԺ դահլիճում չնկատեցի՞ք Սերժ Սարգսյանին ծառայություններ մատուցող քաղաքական չբանտարկյալների. Փաշինյանը՝ Դավթյանին

Այսօր Գլխավոր դատախազի թեկնածու Արթուր Դավթյանը ներկայանում է Ազգային ժողովին:

ԱԺ պատգամավոր Նիկոլ Փաշինյանը մի քանի հարց ուղղեց Արթուր Դավթյանին:

«Քաղաքական բանտարկյալների հարցում Ձեր դիրքորոշումը պարզ է, Դուք հայտարարել էիք, որ Հայաստանում քաղբանտարկյալներ չկան: Իսկ Հայաստանում, Ձեր կարծիքով, քաղաքական չբանտարկյալներ կա՞ն, թե՞ ոչ: Եթե Հայաստանում քաղբանտարկյալ է համարվում նա, ում քրեական պատասխանատվության են ենթարկում քաղաքական դրդապատճառներով, ապա քաղաքական չբանտարկյալ պետք է համարվի նա, ում քրեական հետապնդման չեն ենթարկում՝ էլի քաղաքական պատճառներով, ասենք՝ Սերժ Սարգսյանի հետ ունի անձնական, մտերիմ հարաբերություններ, նրան ծառայություններ է մատուցել: Ձեզ նման դեպքեր հայտնի՞ են: Դահլիճում չնկատեցի՞ք այդպիսի դեմքերի, ում կարելի է համարել քաղաքական չբանտարկյալ: Մասնավորապես, «Հարսնաքարի» գործով Դուք մեղադրող դատախազ եք եղել, էդ գործում այդպիսի մարդկանց հետ առնչություն ունեցե՞լ եք, թե՞ ոչ»,- հարցրեց պատգամավորը:

Արթուր Դավթյանն՝ ի պատասխան պատգամավորի հարցադրման, ասաց, որ վերահաստատում է իր դիրքորոշումը. «Անձանց քրեական հետապնդման կամ նրանց նկատմամբ խափանման միջոցներ ընտրելու հարցում մեր ամենօրյա աշխատանքում հաշվի են առնվում միայն օրենքով նախատեսված հիմքերը: Բայց այդ խնդրի առնչությամբ ես, այո, կարող եմ մտահոգվել, որ կարող է այդպիսի տարածված կարծիք լինել: Այստեղ է, որ դատախազությունն անելիք  ունի, անելիք ունի ավելի հրապարակային աշխատանք իրականացնելու»:

Նիկոլ Փաշինյանը մեկ այլ հարց ևս ուղղեց՝ կապված Սերժ Սարգսյանի նկարի հետ, որը պատգամավորը տեսել է Հատուկ քննչական ծառայության քննիչի պատին կախված: Պատգամավորը հարցրեց՝ Գևորգ Կոստանյանի աշխատասենյակում կախվա՞ծ է այդ լուսանկարը և ինքը և՞ս պատրաստվում է կախել այն իր աշխատասենյակում:

«Այո, ՀՀ գլխավոր դատախազի աշխատասենյակում փակցված է Հանրապետության նախագահի լուսանկարը և ենթաօրենսդրական ակտերի ուսումնասիրությունը, կարծում եմ, Ձեր հարցի պատասխանը կտա»,- պատասխանեց Գլխավոր դատախազի թեկնածուն:

Վերջում պատգամավորը հետաքրքրվեց նաև Դավթյանի առողջական վիճակով. գուցե նա՞ էլ հրաժարական տա առողջական խնդիրների պատճառով, ինչպես Գևորգ Կոստանյանը:

Դավթյանն ի պատասխան ասաց, որ ինքը հասկանում է՝ «ինչի մասին է խոսքը» ու շնորհակալություն հայտնելով՝ ասաց, որ առողջ է: