Ինչո՞ւ երկարաձգվեց Բորդյուժայի պաշտոնավարումը. արդեն ծրագրվա՞ծ էր ապրիլյան պատերազմը

ԼՂՀ ԱԳ նախկին նախարար Արման Մելիքյանը ֆեյսբուքյան իր էջում գրել է.

«Եթե չեմ սխալվում, 2015 թվականի տարեմուտին էր, որ ակտիվ խոսակցություններ սկսվեցին ՀԱՊԿ գլխավոր քարտուղարի պաշտոնում Հայաստանի ներկայացուցչի նշանակման վերաբերյալ: Այն ժամանակ այդ պաշտոնում նշանակվելու թեկնածու էր համարվում ՀՀ պաշտպանության նախկին նախարար Վաղարշակ Հարությունյանը: Անսպասելիորեն և առանց հստակ պարզաբանումների, որոշում կայացվեց Հայաստանի ներկայացուցիչի նշանակումը հետաձգելու վերաբերյալ:

Այսինքն՝ ապրիլյան ռազմագործողության օրերին ՀԱՊԿ-ի գործադիր ղեկավարը կարող էր և ՀՀ ներկայացուցիչը լինել, սակայն դրանից ընդամենը երեք-չորս ամիս առաջ նրա նշանակումը կանխվեց և այժմ էլ հայտարարվում է, որ հոկտեմբերին է սպասվում: Հիմա էլ ԶԼՄ-ների կողմից այդ պաշտոնի հիմնական հավակնորդ է հայտարարված պարոն Սեյրան Օհանյանը:

Հետաքրքիր կլինի իմանալ՝ արդյոք անցյալ տարի պարոն Բորդյուժայի պաշտոնավարման ժամկետը երկարացվեց այն պատճառով, որ ապրիլյան ռազմագործողությունն արդեն ծրագրված էր ու դրա իրականացման պահին ՀԱՊԿ-ի գործադիր ղեկավարի պաշտոնում ՀՀ ներկայացուցչի գտնվելը ցանկալի չէր, թե ինչ-ինչ շրջանակների համար ցանկալի չէր հատկապես Վաղարշակ Հարությունյանի թեկնածությունը: Եւ արդյո՞ք նշված պաշտոնում ՀՀ ներկայացուցչի սպասվող նշանակումը նաև կարող է երաշխիք լինել առ այն, որ նրա պաշտոնավարման տարիների ընթացքում շփման գծում նոր լայնածավալ ռազմական գործողությունների նախաձեռնողն այլևս պաշտոնական Բաքուն չի լինելու»: