Որտեղի՞ց է Կարեն Կարապետյանը պրոֆեսիոնալներ պեղելու

Ասում են՝ Կարեն Կարապետյանը նախարարներին, անգամ՝ դաշնակցական նախարարներին, պաշտոնանկ անելու «դաբրո» ունի: Կանի, թե չի անի, այլ հարց է, սակայն միանշանակ է, որ առաջնորդվելով պրոֆեսիոնալիզմով՝ ներկա իշխանական շրջանակներում քիչ թեկնածուներ կունենա՝ նոր կառավարություն ձևավորելու համար:

Հայաստանում նախարարները քաղաքական պաշտոններ են, այդ իսկ պատճառով պրոֆեսիոնալ կրթությամբ մասնագետ կամ մշակութային գործիչ, բնապահպանության ջատագով անվանումները նման համակարգի համար չեն:

Տարիներ առաջ շշուկներ կային, որ նախարարի պաշտոնն արժե 1 մլն դոլար, այժմ չեն էլ շշնջում՝ պաշտոնը թանկացե՞լ, թե՞ էժանացել է:

Հավելենք, որ փողով գործը հեշտ էր, փողը տալիս էին՝ նշանակվում էին, իսկ ընտրելու դեպքում, արդեն պետք է ոչ հեշտ ընտրություն կատարել:

Իսկ թե ինչպես է ընտրելու նախարարներին, արդեն գործը դժվար է, չկան պրոֆեսիոնալներ, եթե կան՝ իշխանամերձում չեն, իսկ ովքեր տարածքում են, հարյուրամյա կաղնիներ են հիշեցնում, որոնց գործը միայն պաշտոն ունենալն է: Կան հետաքրքիր տիկնայք, ովքեր այս կամ այն տիկնոջ ընկերուհիներն են, որով էլ պայմանավորված է նրանց պաշտոնը:

Հուսանք, որ գազի գրասենյակը չի բերի կառավարություն, քանի որ այստեղ գազից փող քամելու պրոֆեսիոնալներ են, կամ Ռուսաստանից հարմար թեկնածուներ գտնի:

Չի բացառվում Երևանի քաղաքապետարանի «ամենապրոֆեսիոնալ» ներկայացուցիչների ընտրությունը, քանի որ «չեղած տեղից» ընտրություն է պետք անել:

Կարճ ասած՝ եթե Կարեն Կարապետյանը պրոֆեսիոնալ կաբինետ է ուզում, պետք է հնագիտական պեղումներ անցկացնի, սակայն ո′չ իշխանության, ո′չ էլ ՀՀԿ-ի կամ Դաշնակցության, առավել ևս ԲՀԿ-ի, Աստված փրկի, ՕԵԿ-ի շրջանակներում, այլ այնտեղ, որտեղ դեռ մի քիչ պետականամետություն, պարկեշտություն և նվիրվածություն է մնացել:

Ահա՝ որն է Կարեն Կարապետյանի գործը:

NEWSPRESS.am