Ի՞նչ հետք թողեց հրաժարական տված կառավարությունը հայ-վրացական հարաբերությունների զարգացման գործում

Վրացագետ Ալիկ Էրոյանցը ֆեյսբուքյան իր էջում գրել է.

«Ուղիղ երկու ամիս անց Վրաստանում անցկացվելու են հերթական խորհրդարանական ընտությունները, որոնք կորոշեն, թե այնտեղ ձևավորված խորհրդարանի կողմից հաստատված ինչպիսի կազմով կառավարության հետ է համագործակցելու Հայաստանի կառավարությունը, ի դեպ, արդեն մերն էլ՝ նոր կառավարությունը: Իհարկե ենթադրություններ կարող ենք անել, թե ինչպիսի տեմպերով կզարգանան հայ-վրացական հարաբերությունները և ինչ արդյունքներ կգրանցվեն հետագայում, սակայն, ենթադրություններն ավելի իրատեսական դարձնելու համար նախ հասկանանք, թե ինչ հիմք է թողնում այդ տեսանկյունից, կարելի է արդեն ասել, նախկին կառավարությունն իրեն փոխարինողին:

Եթե վերհիշենք վերջին 2.5 տարիներին հայ-վրացական հարաբերություններում արձանագրված մութ ու լուսավոր օրերը, ապա միանշանակ կարելի է ասել, որ դրական արդյունքները նկատելի են, և եթե համեմատական վերլուծության առնենք անցած 10 տարիների ընթացքում տեղ գտած իրադարձությունները, արձանագրենք, որ հայ-վրացական հարաբերությունների շարունակական զարգացման համար նպաստավոր պլատֆորմն ավելի է ամրացել:

Հայաստանի և Վրաստանի՝ տարբեր տնտեսական և մաքսային համակարգերին անդամ դառնալուց հետո սպասվող քաղաքական և տնտեսական հարաբերություների հնարավոր վատթարացումը գործնականում տեղի չունեցավ, դրան զուգահեռ նախանշվեցին համագործակցության նոր ուղղություններ, քայլեր կատարվեցին՝ տարբեր ոլորտներում կապերի ամրապնդման ուղղությամբ:

Թվարկվածին անշուշտ նպաստեց երկու կարևոր հանգամանք: Նախ կողմերն ակտիվացրեցին շփումները, մասնավորապես՝ նախկին ժամանակաշրջանների համեմատ ակտիվացան տարբեր մակարդակներում փոխայցելությունները, և ևս ոչ պակաս կարևոր հանգամանք՝ այդ հանդիպումների ժամանակ բարձրաստիճան պաշտոնյաների կողմից մշտապես հնչեցվել են հայտարարություններն առ այն, որ կողմերը պատրաստ են իրենց բարի կամքը դրսևորել երկկողմ հարաբերությունների զարգացման հարցում: Ստեղծված ջերմ և վստահության մթնոլորտի շնորհիվ նաև հնարավոր եղավ երկկողմ համագործակցության ձևաչափն ընդլայնել. փաստ է անցած տարվա վերջին ստորագրված Ռուսաստան-Վրաստան-Հայաստան-Իրան էներգետիկ համագործակցության պրոեկտի մեկնարկը: Նշված այցերի ընթացքում հնարավոր է եղել մեծապես լուծել վրացական Դարիալի անցակետում առաջացող խնդիրները, Վրաստանի քաղաքացի չհանդիսացող վիրահայերին հուզող և հետագայում վերացած մուտքի արտոնագրի պարտադիր պայմանը: Հիմք դրվեց Թբիլիսիում հայկական դպրոցի կառուցման և «Բարեկամության կամրջի» շինարարության նախագծերին: Առևտրաշրջանառության ծավալների մեծացումը, տրանսպորտային հաղորդակցության, գյուղատնտեսության և զբոսաշրջության ոլորտներում համագործակցության ակտիվացումը ևս դրական ազդեցություն է ունեցել երկու երկրների տնտեսությունների վրա:

Վերոնշյալը, սակայն, ավելի օբյեկտիվ ամփոփելու համար, հավելեմ, որ հայ-վրացական հարաբերությունները զարգացնելու, խորացնելու և նոր մակարդակի բարձրացնելու մեծ հնարավորություն կա: Ոստի առկա ներուժն ավելի կշռադատված, ճիշտ մարտավարությամբ և հնարավորինս փոխադարձ շահերին համադրված կերպով իրացնելու պարագայում Հայաստանն ու Վրաստանը միասին կկարողանան դառնալ միմյանց համար ավելի վստահելի գործընկերներ՝ չեզոքացնելով մեր տարածաշրջանում մեծ ազդեցություն տարածելու ձգտումներ ունեցող Թուրքիային և Ադրբեջանին: Վրաստանն, այսօր գտնվելով թուրք-ադրբեջանական էներգետիկ և տնտեսական կախվածության մեջ, լավագույնս գիտակցում է նաև այդ կախվածության ապագա վտանգները, ուստի, վաղ, թե ուշ իրավիճակը կարող է փոխվել»: