Հաճախ բարձրության վրա աշխատելը 50:50 է. 2015-ին 5 մարդ է մահացել

Աշխատանքի անվտանգության նորմերի խախտման պատճառով 2015թ. արձանագրվել է 45 արտադրական դժբախտ պատահար: Արտադրական դժբախտ պատահարների հետևանքով մահացել է հինգ մարդ: Դժբախտ պատահարներից առավել մեծ թվով տուժել են Սյունիքի մարզում (22) ու Երևանում (10): Մահացածներից երեքն էլ Սյունիքից են: Նման տվյալներ է հրապարակել Ազգային վիճակագրական ծառայությունը:

Նշենք, որ ձևավորվել է այնպիսի մի մթնոլորտ, որտեղ մարդը՝ որպես արժեք, այդպես էլ ո′չ գնահատվում է, ո′չ արժեվորվում: Երևի ապագայում էլ դրան չսպասենք, և այստեղ հարցը ոչ միայն պետական մոտեցումն է, այլև հանրության մոտեցումը:

Մինչև սովորական դարձավ, որ ամրագոտիներ ամրացնելը կարևոր է, որոշ ժամանակ անցավ, այն էլ՝ հսկողության տակ: Վարորդները չեն էլ մտածում, որ դա արվում է իրենց իսկ անվտանգության համար, որովհետև նրանց մի մասը հասնելով Երևան՝ ձևականորեն ամրագոտին նետում է ուսին, որն անգամ ամրացված չէ: Սա՝ հանրային մոտեցումն անվտանգությանը:

Անվտանգության ստուգումները ևս պատշաճ չեն կատարվում:

Ասում են` ժամանակին, երբ կառուցում էին Հայաստանում դեսպանատներից մեկը, թուրքական մի ընկերություն այն կառուցեց, որովհետև, երևի թե, չէին վստահում անվտանգության որևէ կանոնի չհետևող կազմակերպություններին:

Այսօր էլ, եթե որևէ շինարարական կիսակառույցի աշխատանքներին հետևենք, ապա կտեսնենք, որ որևէ անվտանգության կանոն չի գործում. հագնվում են՝ ինչպես պատահի, երբեմն առանց համապատասխան գլխարկների, բարձրությունների վրա ևս չեն հետևում անվտանգության կանոններին: Ինչպես ասում էր ծանոթ շինարարներից մեկը՝ «Հաճախ բարձրության վրա աշխատելը 50:50 է»:

Ինչ վերաբերում է Սյունիքի մարզի դժբախ դեպքերին, ապա այստեղ հիմնականում կապված է հանքարդյունաբերության հետ, որտեղ ևս անվտանգության կանոնները հետին պլանում են:

Ի դեպ, Ազգային վիճակագրական ծառայությունը չի նշել, թե արտադրական որ ոլորտներում են տեղի ունեցել դժբախտ պատահարները, ինչը երևի թե պատահական վրիպում չէ, քանի որ նշվելու էր հանքարդյունաբերությունը, որն, ինչպես գիտենք, Հայաստանում գերադասվում է ցանկացած ոլորտից:

Իհարկե, այս թվերն ավելի խոսուն կլինեն, եթե հատկապես Սյունիքի մարզի հանքարդյունաբերության ազդեցության գոտիները ևս ճշգրտվեն, և այն բնակիչները, ովքեր բնակվում են հատկապես պոչամբարների հարևանությամբ, եթե անցնեն համապատասխան ազդեցությամբ պայմանավորված հետազոտություն, ապա տուժածների թիվն ավելի մեծ կլինի:

NewsPress.am