Վրաստանի վարչապետ Գիորգի Կվիրիկաշվիլին Հայաստանում է. տեսակետ այցի վերաբերյալ

Այսօր պաշտոնական այցով Հայաստանի Հանրապետություն է ժամանել Վրաստանի վարչապետ Գիորգի Կվիրիկաշվիլին:  Այցի շրջանակում նախատեսվում են Վրաստանի վարչապետի հանդիպումները ՀՀ Նախագահ Սերժ Սարգսյանի, ՀՀ վարչապետ Հովիկ Աբրահամյանի հետ:
Վրաստանի վարչապետի գլխավորած պատվիրակությունն արդեն այցելել է Ծիծեռնակաբերդի հուշահամալիր՝ հարգանքի տուրք մատուցելու Հայոց ցեղասպանության զոհերի հիշատակին:

NewsPress.am-ի թղթակցին վրացագետ Ալիկ Էրոյանցն ասաց, որ Վրաստանի վարչապետի այցի վերաբերյալ միայն դրական ակնկալիքներ ունի՝ կանխատեսելով, որ կքննարկվեն Հայաստանի և Վրաստանի միջև առկա համագործակցության, ընթացիկ ծրագրերի, ինչպես նաև՝ նոր պրոյեկտների վերաբերյալ հարցեր:

«Բայց մեկ բան հստակ է. կողմերն ակտիվ բարձրաստիճան փոխայցելությունների միջոցով նպաստում են այդ բոլոր ծրագրերի առավել կայուն և բնականոն իրականացմանը, մյուս կողմից հաստատում, որ Հայաստանի և Վրաստանի իշխանությունները պատրաստակամ են համագործակցելու տարբեր ուղղություններով և էլ ավելի ամուր հիմքեր ստեղծելու հետագա տնտեսական և քաղաքական համագործակցության համար»,- ասաց վրացագետը:

Ըստ Ա. Էրոյանցի բնութագրման՝ հայ-վրացական ներկա շփումներն առավել պարզ են և անկեղծ, իսկ երկու վարչապետերը համագործակցության բավական անմիջական և անկաշկանդ մթնոլորտ են ստեղծել՝ վայել հայ-վրացական բարեկամությանը, ինչն, անշուշտ, դրական է և գնահատելի:

«Դրան զուգահեռ, սակայն, կա հանգամանքը, այսինքն՝ երկու պետության՝ Թուրքիայի և Ադրբեջանի, մասնավորապես վերջինների՝ Վրաստանի հետ ունեցած բարձրամակարդակ հարաբերությունների հանգամանքը: Միևնույն ժամանակ, Թբիլիսին հասկանում է, որ հեռանկարային առումով Հայաստանի և Վրաստանի շահերն ավելի են համընկնում և երկու երկրներն այս տարածաշրջանում պարտավորված են զարգացնելու հայ և վրացի ժողովուրդների կողք-կողքի խաղաղ և անվտանգ ապրելու բազմադարյա ավանդույթը»,- ասաց վրացագետ Ալիկ Էրոյանցը: