Սխալների համար պատասխանատուն մնաց օդում կախված

Մարդու իրավունքների Եվրոպական դատարանում «Սիմոնյանն ընդդեմ Հայաստանի» գործով արդարացի փոխհատուցման համար ՀՀ կառավարությունն օգոստոսի 18-ի նիստում Արդարադատության նախարարությանը 18.255 եվրոյին համարժեք դրամ հատկացրեց:

Որոշումը հաստատելուց առաջ, սակայն, վարչապետ Հովիկ Աբրահամյանը հանձնարարեց գույքագրել, թե ՄԻԵԴ-ի վճիռներով որքան գումար է հատկացվել 2014, 2015 և 2016 թվականի 7 ամսվա ընթացքում:

«Ու, ընդհանրապես, այդ սխալ որոշումների համար ինչ-որ մեկը պիտի պատասխան տա՞, թե՞ ոչ: Հարկավոր է գույքագրել, ավելի մանրամասն հասկանալ այդ հարցը»,- հայտարարեց Հովիկ Աբրահամյանը:

Կառավարության աշխատակազմի ղեկավար-նախարար Դավիթ Հարությունյանը կառավարության այսօրվա նիստում ասաց, որ ուսումնասիրությունների արդյունքը պատրաստ է և ընդամենը ներկայացրեց, թե վերջին տարիներին ընդդեմ Հայաստանի քանի վճիռ է կայացրել ՄԻԵԴ-ը: Ըստ այդ տեղեկատվության՝ 2014 թվականին ՄԻԵԴ կողմից ընդդեմ Հայաստանի ընդամենը 4 վճիռ է կայացվել՝ 166 հազար եվրո փոխհատուցմամբ, 2015 թվականին՝ 8 վճիռ՝ 86 հազար եվրո փոխհատուցմամբ, 2016 թվականին՝ դարձյալ 8 վճիռ՝ 83 հազար եվրո փոխհատուցմամբ:

«Իսկ Արդատադատության նախարարությունը պատճառների մասին խոսո՞ւմ է, թե՞ չկան ըտենց բաներ: Մենք հետևանքներն ենք հիմա քննարկում»,- դժգոհեց վարչապետ Հովիկ Աբրահամյանը:

Դավիթ Հարությունյանը հայտարարեց, որ կարծում է՝ պատճառները պարզ են, դրանք Հայաստանի դատական համակարգում առկա սխալներն են:

«Բոլոր երկրներում էլ լինում են սխալներ դատական համակարգերում, բայց երկրի դատական համակարգում, երբ սպառվում են սխալը շտկելու հնարավորությունները, մարդիկ դիմում են ՄԻԵԴ»,- բացատրեց Դավիթ Հարությունյանը:

Նրա խոսքից հետո վարչապետը միայն արձագանքեց. «Լավ»:

Իսկ սխալների համար պատասխանատուն մնաց օդում կախված: