Շուտով Հայաստանի բնակչությանը հասանելի կդառնա ևս մեկ գերժամանակակից ծառայություն. ԱՆ

Ուռուցքաբանության գերազանցության հայկական կենտրոնի 1-ին փուլի` Իզոտոպների արտադրության կենտրոնի ստեղծման գործընթացն ավարտական փուլում է: Այս մասին հայտնում են ՀՀ առողջապահության նախարարությունից՝ նշելով, որ այս փուլում իրականացվում են արտաքին տարածքի բարեկարգման, ինչպես նաև լաբորատորիայի հագեցման աշխատանքները:

Զուգահեռաբար ընթանում է 2-րդ փուլի՝ Ճառագայթային բուժման կենտրոնի, ստեղծման գործընթացը: Ճառագայթային բուժման նոր կենտրոնը հագեցած կլինի արդի գծային արագացուցիչներով, բրախիթերապիայի համար նախատեսված սարքավորումով, ինչպես նաև կունենա հզոր ախտորոշիչ մաս: Կենտրոնի պլանային հզորությունը նախատեսված է տարեկան շուրջ 1250 հիվանդի բուժման համար: Հարկ է նշել, որ աշխարհում մեծ պահանջարկ ունեցող ճառագայթային թերապիան համարվում է չարորակ նորագոյացությունների բուժման առավել ծախսարդյունավետ մեթոդներից մեկը, որը ցուցված է հիվանդների շուրջ 50 տոկոսին:

Այսօր, ՀՀ առողջապահության նախարար Արմեն Մուրադյանը ծրագրի իրականացման պատասխանատուների հետ շինհրապարակում է եղել: Նախարարը ծանոթացել է ավարտական փուլում գտնվող աշխատանքների ընթացքին: Զեկուցվել է, որ ավարտվում է նաև Ճառագայթային բուժման կենտրոնի նախագծանախահաշվային փաստաթղթերի մշակման գործընթացը, և շուրջ մեկ ամսից կհայտարարվի շինարարական աշխատանքների իրականացման կապալառու կազմակերպության ընտրության մրցույթ:

Ամփոփելով, նախարար Մուրադյանը պատասխանատուներին տվել է մի շարք հանձնարարականներ, մասնավորապես՝ խստիվ հետևել աշխատանքների պատշաճ որակի ապահովմանը և հաստատված ժամկետների պահպանմանը, քանի որ նորաստեղծ ծառայություններն ունեն կենսական նշանակություն չարորակ նորագոյացությունների կանխարգելման, վաղ հայտնաբերման, ինչպես նաև արդյունավետ բուժման համար: