«Գրոհ» Մալաթիա-Սեբաստիա վարչական շրջանի երեխաների վրա

Մալաթիա-Սեբաստիա համայնքում Սամվել Ալեքսանյանի մերձավորներն անցել են գրոհի:

Արդեն երկու շաբաթ է, ինչ տարբեր կլոուններ այցելում են համայնքի տարբեր բակեր, հավաքում են երեխաներին, նրանց հետ երգում ու պարում, ապա երեխաներին պարտադրում շնորհակալություն հայտնել Սամվել Ալեքսանյանի մերձավորներին, մասնավորապես՝ զարմիկին՝ վարչական շրջանի ղեկավար Արտակ Ալեքսանյանին, փեսային՝ պատգամավոր Կորյուն Նահապետյանին և Սամվել Ալեքսանյանի հարազատ ՀՀԿ կուսակցությանը:

Զավեշտալի դեպքը գրանցվեց Բ1 թաղամասի բակերից մեկում, երբ վարչական շրջանի ղեկավար Արտակ Ալեքսանյանի կողմից վարձված կլոունը հերթական փոքրիկին հարցրեց, թե քանի տարեկան է, որտե՞ղ է ապրում. «Ապրում եմ Թուրքիայում, հայրս թուրք է, մայրս՝ հայ…»:

Փոքրիկի այս պատասխանին անմիջապես հետևեց կլոունի նախ զարմանքը, ապա զոմբիացած խոսքը. «Երեխանե′ր, բոլորս միասին շնորհակալություն հայտնենք Արտակ Ալեքսանյանին և ՀՀԿ կուսակցությանը:

Սա առաջացրեց ծնողներից մեկի զայրույթը, ով մոտեցավ Արտակ Ալեքսանյանի կողմից ուղարկված սուրհանդակներին և պահանջեց կլոունի միջոցով երեխաներին չպղծել և չխառնել քաղաքականությանը: Պատասխանն առավել քան Հանրապետականի էր. «Չեք ուզում՝ տուն տարեք ձեր երեխային»:

Սամվել Ալեքսանյանի մերձավորների գրոհը շարունակվեց նաև սեպտեմբերի 1-ին վարչական շրջանի դպրոցներում: Ի տարբերություն նախորդ տարիների, երբ սեպտեմբերի 1-ին Արտակ Ալեքսանյանի և պատգամավոր Կորյուն Նահապետյանի կողմից ընդամենը մեկ միասնական ընդհանուր ուղերձ էր ուղարկվում դպրոցներին, ապա այս տարի Արտակ Ալեքսանյանն անձամբ էր եկել դպրոց՝ Սամվել Ալեքսանյանի վաղեմի մերձավոր, փոխքաղաքապետ Դավիթ Օհանյանի հետ ողջունելու երեխաներին:

Առաջիկա մեկ տարում կանխատեսվում է ալեքսանյանական հուժկու գրոհ Մալաթիա-Սեբաստիա վարչական շրջանում՝ հերթական ընտրությունը «հորով-մորով» անելու համար:

Ցավոք, ալեքսանյանական գրոհն սկսվել է երեխաների ուղղությամբ՝ պղծե՛լ, պղծե՜լ մինչև վերջ:

NewsPress.am