Կարեն Ավագյանի կողքին նստած Սեյրան Օհանյանը ումո՞վ էր հպարտանում

«Բազե» համահայկական հավաքի կազմակերպիչն է Հայաստանի երիտասարդական հիմնադրամը, ըստ որի ամենամյա հավաքի հիմնական նպատակն է բացահայտել տաղանդաշատ երիտասարդների, նրանց տալ ինքնադրսևորման հնարավորություն, մասնակիցների շրջանում սերմանել թիմային աշխատանքի և արդար մրցակցության ոգի։

Ի դեպ, «Համահայկական երիտասարդական հիմնադրամն» ամեն տարի պետական բյուջեից գումարներ է ստանում, ՀՀ նախագահի կողմից ընտրված գործընկեր կազմակերպություն է և ամենակարևորը՝ որ այդ հիմնադրամը ղեկավարում է երիտասարդ հանրապետական, «Փուչիկ» մականունով Կարեն Ավագյանը, ով բանակում ծառայած չլինելով՝ փորձում պետական բյուջեի փողերի հաշվին ՀՀԿ-ի սիրով տոգորված ջահելներին հավաքել Ծաղկաձորում ու բացատրել թիմային աշխատանքի կարևորությունը:

Ասենք, Կարեն Ավագյանը պիտի սովորեցնի, թե, օրինակ, երբ թիմը պահանջում է ասել «Դոդի Գագո», ապա դա երբ պետք է հնչեցնել և որքան հուժկու, որ թիմը բավարարվի: Հետո պետք է Կարեն Ավագյանին ու բազեականներին այցելի նախարար Սեյրան Օհանյանը, նստի բանակում չծառայած, բայց բոլոր բարիքներից օգտվող Կարեն Ավագյանի կողքին ու ներկայացնի ապրիլյան քառօրյա պատերազմում զինծառայողների սխրանքների մասին, որի հիմնական հեղինակները նախարարի հաստատմամբ աղքատ ընտանիքների զավակներն են:

Հենց ապրիլյան պատերազմին հաջորդող օրերին էր, որ նախարարին հարց ուղղվեց, թե այդ ինչպե՞ս է ստացվում, որ առաջնագծում անապահով ընտանիքների երեխաներն են, արդյոք կոռուպցիայի դրսևորում չէ՞ դա, նախարարը պատասխանեց. «Այնքան էլ չի համապատասխանում իրականությանը: Կան օբյեկտիվ հանգամանքներ, որ մենք պետք է պարզաբանենք՝ հասարակությունն իմանա հետևյալը. ովքեր են կարողանում այսօր բարձրագույն կրթություն ստանալ, գիտական թեզեր ունենալ, ստանալ տարկետում, ասպիրանտուրա ընդունվել: Այդ իրականության մեջ, կարծում եմ, հիմնականում միջին և բարձր խավերի ընտանիքներից են, որ ընդունվում են բուհեր, նրանց մեծ մասը հետագայում լրացնում են սերժանտական կազմը, այս կամ այն մասնագիտությունները, որոնք առաջնահերթ նշանակություն ունեն զինված ուժերում»:

Այսինքն՝ սահմանին կանգնած և սխրանք կատարող զինվորը չի կարող կապ ունենալ «Բազեի» հետ, քանի որ նա սերում է աղքատ ընտանիքից, փոխարենն այդ զինվորի սխրանքը կներկայացվի Կարեն Ավագյանին ու մնացած բազեականներին, որոնց վրա այս օրերին ծախսվող գումարը հաստատ ավելի նպատակային կլիներ սահմանում: Ու քանի որ ապրիլը ոմանց համար հետևում է, ուրեմն պետք է զարկ տալ «Բազեին»՝ մոռանալով, որ պետական ռեսուրսները պետք է արդյունավետ ծախսել: Ապրիլյան պատերազմից հետո վարչապետ Հովիկ Աբրահամյանը հորդորեց չհավատալ պատվիրատու լրատվամիջոցներին, որոնք տարբեր սուտ, անհիմն տեղեկատվություններով մարդկանց գցում են այլ կարծիքների, մտքերի մեջ՝ պետական ռեսուրսներն անարդյունավետ ծախսելու առումով:

Հետաքրքիր է՝ ո՞րն է «Բազեի» համար գումարներ ծախսելու արդյունավետության տրամաբանությունը: Այն, որ «Բազեից» հեռու կանգնած աղքատ ընտանիքների տղաների սխրանքը ներկայացվի կամ ի ցույց դրվի, թե օրինակ ինչպես կարող է երիտասարդը չծառայել բանակում, բայց իշխանության հոգատար աչքը միշտ նրա վրա լինի, վկան՝ Կարեն Ավագյանը:

Newspress.am