Լղոզվելու ժամանակը և չլղոզվելու ժամանակը

Գյումրիի ավագանու նիստում որոշում է ընդունվել, համաձայն որի Սերժ Սարգսյանի եղբորը՝ Լևոն Սարգսյանին, շնորհվել է «Գյումրու պատվավոր քաղաքացու» կոչում: Ավագանու անդամներից դեմ է քվեարկել միայն Ժուռնալիստների «Ասպարեզ» ակումբի նախագահ Լևոն Բարսեղյանը:

Նշենք, որ պատվավոր քաղաքացի տիտղոսը տրվում է այն անձանց, ովքեր խոր հարգանք են վայելում տվյալ քաղաքի բնակիչների կողմից, նաև այդ քաղաքի համար կարևոր գործեր են արել, ներդրել նաև սեփական միջոցները, բարելավվել է քաղաքի բնակչության կյանքը, կառուցել է էական նշանակություն ունեցող կառույցներ և այլն:

Թե թվարկածներից հատկապես որ գործերի համար է Լևոն Սարգսյանն առաջադրվել, Հայաստան աշխարհի որևէ բնակիչ չի կարող վկայել, իսկ ինչ վերաբերում է գյումրեցիներին, ապա նրանք ի նշան Լևոն Սարգսյանի «բարեգործությունների» ստորագրահավաք են սկսել՝ չեղարկելու նրա «պատվավոր քաղաքացի» կոչումը:

Բացի այդ, նիստի օրակարգը, որին, սովորաբար, տեղյակ է լինում հանրությունը, Լևոն Սարգսյանին նման բարձր պատվի արժանացումը գաղտնի է պահել, երևի վախեցել է գյումրեցիների շատ բուռն սիրո դրսևորումներից:

Հիշեցնենք, որ առաջարկը ներկայացրել էր Մանկավարժական ինստիտուտի նախկին ռեկտոր, ԲՀԿ-ական Վարդևան Գրիգորյանը և Կոնսերվատորիայի Գյումրու դասախոս Կարինե Ավդալյանը. առաջարկը Գյումրու քաղաքապետ Սամվել Բալասանյանն ընդունելի է համարել:

Հիշեցնենք, որ Գյումրու պատվավոր քաղաքացիներ են հռչակվել Վիկտոր Համբարձումյանը, Արտավազդ Փելեշյանը, սակայն ի թիվս մեծանուն դեմքերի, ժամանակի կուսակցությունները փորձել են խցկվել Գյումրի, չգիտես ինչու, պատվավոր քաղաքացու անվան տակ:

Եթե հիշենք ոչ վաղ անցյալը, ապա ոչ ոք չէր հավատում ոչ Ստալինի արձանների կործանմանը, ոչ էլ Լենինի արձանների գլխատմանը, ոչ էլ Կոմունիստական կուսակցության մյուս կարկառուն դեմքերի անկմանը: Այնպես որ ժամանակին խաբել պետք չէր՝ անկումն ավելի ցավալի է լինում, կամ «պատվավոր քաղաքացիների» կամ էլ նրանց ժառանգների համար:

Չի բացառվում նաև, որ ժամանակի փոփոխությունների հետ հենց այն անձինք, ովքեր նպաստել են Գյումրու պատվավոր քաղաքացիներին, հենց նրանք առաջինը հրապարակային հրաժարվեն նրանցից, երբ գա չլղոզվելու ժամանակը:

Newspress.am